Вирусната болест EXANTEMA SUBITUM која се јавува кај доенчињата, наречена уште и шестата болест е предизвикана од човечкиот херпес вирус тип 6 (HHV-6) и од страна на HHV-7 во 10-30 % од случаите
Exantema subitum е акутна вирусна болест која најчесто се јавува кај доенчиња, а се карактеризира со тридневна висока температура која може да биде проследена со конвулзии и благ осип кој се јавува по нејзиното намалување.
ЕТИОЛОГИЈА И ЕПИДЕМИОЛОГИЈА
Exantema subitum или уште наречена Roseola infantum (шестата болест) е предизвикана од човечкиот херпес вирус тип 6 – Human herpes virus HHV-6 и од страна на HHV-7 во 10-30 % од случаите. Трансмисијата е преку контаминирана плунка, што укажува на развојот на доживотна латентна инфекција која може да се реактивира, но симптоми пројавуваат имунокомпромитирани лица. Exantema subitum се јавува спорадично во текот на целата година.
КЛИНИЧКИ МАНИФЕСТАЦИИ
Инкубација 5-15 дена. Се карактеризира со хипертермија (39-41 °С) со ненадеен почеток и трае 3-5 дена, а потоа нагло опаѓа и се јавува макуло-папулозен исип за кој претежно родителот се јавува на лекар и обично трае 1-3 дена, но може да избледи брзо, исто така може да се појави и нагло зголемување на вратните, ретроаурикуларни лимфни жлезди.
ЛАБОРАТОРИСКИ ИСПИТУВАЊА И УТВРДУВАЊЕ ДИЈАГНОЗА
Во крвната слика преовладува само лимфоцитната гранка. Анамнезата и клиничката слика се доволни, а примарната инфекција се потврдува серолошки.
ТЕРАПИЈА
Не постои специфична терапија. Секојдневната нега вклучува употреба на адекватна хидратација и антипиретици, витаминотерапија и премивка, а по потреба и антиконвулзанти како дел од трајна или интермитентна профилакса.
Колумните на Д-р сци. Светлана Смугреска
