Денес светот го одбележува Денот на физичката активност со цел да се истакне нејзината корисност за здравјето
„Во здраво тело здрав дух“ е максима која никогаш нема да излезе од мода, токму заради тоа што е точна. А здравото тело се одржува со грижа за себе и со континуирана физичка активност. Она што им е заедничко на долговечните луѓе е нивната постојана активност, за разлика од современата „кауч култура“. Физичката активност и здравјето се неминовно поврзани. Без оглед на возраста, физичката активност е многу корисна за одржување како на физичкото, така и на менталното здравје. Го намалува ризикот од развој на кардиоваскуларни заболувања, како и ризикот од дијабетес, го спречува развојот на остеопороза, ја подобрува издржливоста и мускулната маса и сила, го намалува стресот, го подобрува сонот и го намалува ризикот од депресија и деменција.Денес се одбележува „Светскиот ден на физичката активност“. Целта на оваа иницијатива наречена „Движи се за Денот на здравјето“ од страна на Светската здравствена организација – СЗО, е да се истакнат придобивките од активниот начин на живот за превенција на незаразни болести, да се промовира здрав животен стил преку спорт и физичка активност.
Ангажирањето за извршување на физички активности се намалува со зголемување на возраста, а во согласност со последните податоци, до 60 проценти од населението во Европа се физички неактивни. Физичка активност не значи само занимавање со спорт. Таа подразбира континуираната активност која може да трае и само половина час дневно а да има здравствени придобивки на долгорочен план. Редовната физичка активност е важна за секого, но е клучна за младите и децата во развој. Современите начини на рекреација и поминување на слободното време со телевизија, интернет и видео игри водат кон прекумерна тежина која може да придонесе кон појава на бројни заболувања како и формирање на штетни животни навики подоцна во животот.
Со цел зголемување на физичката активност меѓу младите на ниво на Република Македонија, се изградени голем број на спортски сали, фудбалски игралишта и повеќенаменски игралишта. Актуелен проблем во сите градови на кој треба да се работи е потребата од градски базени за изведување спортски активности и рекреација, како и потребата од реновирање на постоечките спортски објекти.
