Дознајте дали спортските часовници коишто се новите омилени „гаџети“ за мерење на чекорите и согорените калории се практични и ефективни
Дизајнерските спортски часовници и педометри се креирани да понудат модерно модно парче за вљубениците во современиот дизајн, но истовремено, нови технолошки функции за активните спортисти, како практично сметање на чекорите и на загубените калории. Овие часовници постанаа вистински „хит“ во секојдневното вежбање и практикување било какви физички активности бидејќи се вели дека влијаат позитивно на мотивацијата кај спортистите и им помага на оние коишто сакаат да ги намалат вишокот килограми.
Една студија, неодамна спроведена од страна на истражувачи од Универзитетот во Питсбург, САД, чии резултати се објавени во Американскиот дневник „JAMA“ дознава дека, всушност, спортските часовници со современите функции за лесно мерење на согорените калории не помагаат во реалното слабеење. Напротив, истражувањето докажува дека токму оваа функција на часовникот може да го отежни процесот на слабеење и да го демотивира корисникот во спортувањето. Истражувањето кое траело 24 месеци било спроведено на околу 500 испитаници, мажи и жени со прекумерна тежина на возраст од 18 до 35 години. Во текот на првите шест месеци се водела првата фаза од истражувањето во која на испитаниците им била дадена задачата да водат нискокалорични диети и да вежбаат околу 100 минути неделно. Исто така, испитаниците секоја недела посетувале групни сесии за советување. Кај секој испитаник било забележано намалување на килограмите во првите шест месеци, со што истражувачите продолжиле со втората фаза од истражувањето во која ги поделиле испитаниците во две групи. На првата група ѝ била дадена задача да се регистрира на веб-страница и да ги внесува податоците од физичките активности за секој период, додека на втората група ѝ биле дадени спортски часовници за сметање на чекорите, согорените калории и сл.
Според анкетата којашто ја направил водечкиот истражувач во студијата, професорот за здравје и физичка активност Џон Јакичич, испитаниците сметале дека онаа група којашто ќе носи спортски часовник ќе има подобри резултати во намалувањето на тежината. Во наредните 18 месеци, едната група редовно ги бележела своите резултати на страницата, а другата група преку часовниците. На крајот на двегодишното истражување резултатите покажале дека испитаниците од групата којашто носела спортски часовници, всушност, загубиле помалку килограми од оние коишто не носеле. Оние коишто не ги носеле часовниците загубиле просечно 5 килограми, додека оние коишто ги носеле околу 3 и пол килограми.
Резултатите од ова истражување се надоврзуваат на некои претходни истражувања коишто докажуват дека сè почесто спортските часовници по одреден период на користење завршуваат зафрлени негде во домот. Се смета дека околу една третина од корисниците вообичаено по период од шест месеци прекинуваат да ги користат часовниците додека спортуваат. Оттука, истражувачите сметаат дека се потребни дополнителни истражувања за ефективноста на спортските часовници како и можеби промена и воведување на креативни функции коишто вистински би го мотиварале корисникот.
