Не е ваша вина доколку не слушате што ви зборуваат додека гледате телевизија
Партнерот не ви посветува внимание кога гледа телевизија? Додека се возите со воз не сте го чуле името на станицата бидејќи сте читале? Вашето дете ве игнорира додека зборувате, бидејќи игра компјутерска игра? Науката има објаснување за ова однесување кое можеби не е само иритирачко, туку невролошко. Не станува збор за селективно слушање, туку привремена глувост заради концентрирање на визуелна активност, што ја намалува способноста за слушање на звуци. Ова се случува бидејќи нашиот мозок не може да прави мултитаскинг, барем кога се работи за сетилата за слух и вид.
Според новото истражување, може да се биде привремено глув на надворешни звуци доколку е активно ангажирано сетилото за вид.
Малата студија од група експерти од University College of London го нарече ова однесување како „глувост од невнимание“. Според нив, сетилата за слух и вид се во истата област, наречена асоцијативна, и заради ограничување на капацитетот за обработка на информации, мозокот е принуден да избере помеѓу двете сетила. Испитувањето било спроведено врз тринаесет волонтери каде што се заклучило дека кога волонтерите извршувале визуелна задача која барала нивно активно ангажирање, тие не ги слушале звуците кои што инаку би ги чуле. Снимките од мозокот покажале дека испитаниците не само што го игнорирале или филтрирале звукот, туку воопшто не го чуле.
Вакви истражувања биде спроведувани и претходно, но за прв пат е направено истражување со набљудување на мозочната активност во реално време, каде што директно можат да се видат промените во мозокот.
Во асоцијативните делови се врши сложена обработка на повеќе различни информации кои доаѓаат од различни делови на кората, па се случува некогаш некоја информација да се намали за сметка на друга. Глувоста од невнимание е често искуство во секојдневниот живот и сега знаеме зошто, истакнуваат истражувачите.
„На пример, доколку се обидете да зборувате со некој кој што е фокусиран на читање книга, играње игра или гледање телевизија и притоа не добиете одговор, тоа не значи дека ве игнорираат, туку дека едноставно не ве слушаат“, истакнува професорката Нили Лави – Nilli Lavie. Професорката исто така истакнува дека овој вид на глувост, во некои ситуации може да биде опасно однесување, на пример, доколку сте учесници во сообраќај.
