Дали и вие често пати имате дилема кој лек против болка да го користите? Каков лек и да одберете треба да внимавате, бидејќи сите лекови против болки можат да имаат несакани последици, особено кога не се земаат според упатство или препораките од вашиот лекар
Многу лекови против болки достапни на пазарот имаат многу сличен, па дури и ист состав. Некои од нив делуваат веднаш и тие се идеални за мигрена, а други имаат состојки што го продолжуваат дејството неколку часови, идеално за оние лица кои имаат хронични болки и сакаат да заспијат. Кога некој ќе проголта вообичаено апче против болка како што е ибупрофенот, истото се пренесува со крвотокот низ целиот организам, вели лекарот Фара Шeик – Farrah Sheikh од Велика Британија. „Оние лекови кои таргетираат специфични области, ќе ги третираат областите со болки, но тие не можат да бидат насочени директно кон конкретниот дел од телото“ – објаснува таа.
Не се фокусирајте на брендот и амбалажата, туку на составот
На пазарот имаме огромен избор на генерички еквиваленти – исти или слични лекови со различно име, кои најмногу се разликуваат во нивната цена, достапни не само по аптеките, туку и на секоја бензинска пумпа и супермаркет. Најчесто луѓето се водат според препознатливоста на брендот или убавата амбалажа на лековите и често пати поради тоа плаќаат многу повеќе, а не добиваат поефикасен лек, т.е. она што им е потребно.
Научна студија откри дека луѓето кои се поедуцирани, на пример лекарите или фармацевтите и останатите луѓе на кои медицината им е блиска, било помалку веројатно да купат брендиран лек, наспроти генеричките варијанти. Таа советува да се препорачува користењето на поевтините генерички лекови против болки, но исто така вели дека многу од нејзините пациенти сè уште им се лојални на одредени брендови. „Вие всушност плаќате за маркетингот и за сјајната кутија“ – констатира д-р Шеик.
Во една друга неодамнешна научна студија, научниците им давале на испитаниците со честа мигрена, плацебо апче. Некои од тие лажни апчиња биле спакувани како брендирани лекови, а некои од нив не биле.
Брендираните плацебо пилули биле пријавени како поефективни во справувањето со болките од страна на испитаниците и биле асоцирани со помалку споредни ефекти во споредба со плацебо апчињата спакувани како генерички лекови.
„Довербата е многу важен аспект во однос на нашето здравје“ – вели Изабел Шмигин – Isabelle Szmigin која е професор по маркетинг на Универзитетот во Бирмингам. „Луѓето се генерално многу повнимателни кога купуваат лекови“ – додава таа. Ова помага да се објаснат телевизиските реклами за лекови против настинка и грип секоја зима. Целта на производителите е да создадат цврсто изградени и познати брендови кои луѓето лесно ќе ги помнат кога ќе одат во продавница или аптека. „Постојат многу потрошувачи кои го земаат истиот лек секој пат“ – додава д-р Шмигин.
Боите исто така имаат големо влијание врз тоа какви чувства им буди лекот што го земаат. Потврдено е дека црвените лекови се пријавени како поефикасни за третирање на болки во споредба со сините, зелените или белите. Но, сините пилули се покажаа како поефикасни за смирување во споредба со црвените. Исклучок од оваа статистика биле само италијанските мажи, најверојатно поради тоа што сината боја ги асоцирала на нивниот национален фудбалски тим.
[interaction id=”56e6c21e518248f65e9dfafd”]Јаките бои можат да помогнат производот да биде истакнат во излогот. Исто така, производителите се трудат истиот лек да го произведат под различни варијации, како на пример само за менструални болки, само за главоболки, форте, макс, за деца итн. за нивниот бренд да може да добие што е можно поголем изложен простор во аптеката или продавницата. Друга значајна разлика помеѓу лековите против болка и покрај нивните сличности во составот е нивната форма, која често го олеснува или отежнува проголтувањето, но исто така и вкусот. Па затоа, некои лекови се погорчливи од други и поради тоа одбивани од страна на децата.
