Консумирањето на цедени сокови како дел од здравата исхрана е доста распространета навика. Од една страна се сметаат за хранливи, но од друга имаат и недостатоци
Цедените сокови се одличен избор доколку не сакате да јадете овошје и зеленчуци, затоа што преку нив ќе ги внесете сите потребни витамини. Тие се најчесто дел од плановите на исхрана на многу луѓе кои сакаат да ја намалат тежината и да го подобрат здравјето. Но, дали се навистина толку добри како што е опишано во рекламните кампањи?
Според многумина, цедењето на различни видови овошје и зеленчук е подобро отколку јадењето цели овошja или зеленчуци, бидејќи на тој начин телото може полесно да ги апсорбира хранливите материи. Но, кога пиеме цедени сокови не ги внесуваме растителните влакна што се наоѓаат во овошките и зеленчуците. Ние го цедиме и го пиеме сокот кој содржи најголем дел од минералите и витамините во овошјето, а во пулпата останува голем дел од растителните влакна кои исто така се од особено значење за организмот.
Додајте дел од пулпата во цедениот сок за да внесете растителни влакна или пак користете добар блендер со кој ќе ги изблендирате овошките или зеленчукот по ваш избор и истовремено ќе ги задржите и растителните влакна. Внимавајте на калориите. Цедените сокови знаат да бидат калорични, особено доколку цедите сок само од различни видови на овошје.
Сокот од зеленчук содржи многу помалку калории. Добра комбинација би била сок од неколку вида на зеленчуци и еден вид на овошје за подобар вкус.
Цедените сокови можат да ви ги дадат витамините и минералите кои ви се потребни, но со нив не внесувате протеини, а протеините се исто така многу важни за организмот.
Исцедете сок и во него додајте јогурт, ленено семе, путер од кикиритки или слично за да внесете дел од потребните протеини.
Доколку сакате да ја намалите тежината, внимавајте со цедените сокови. Поради недостатокот на растителни влакна и протеини многу лесно може да паднете во искушение за нездрава храна како хамбургер или парче торта. Диетите кои се базираат само на течна храна се доста екстремни, а постои можност крајните резултати да не траат долго и килограмите да се вратат.
Цедените сокови може да го зајакнат имунитетот поради витамините и минералите кои ги содржат, а исто така се поврзуваат и со намален ризик од појава на срцево заболување или рак. Но сепак, потребни се повеќе истражувања за нив и нивниот придонес за здрав живот.
Па, доколку во моментов размислувате да си исцедите една чаша сок, не го цедете во големи количини затоа што свежо исцедените сокови можат лесно да се расипат. Ако користите блендер, лупете ги продуктите и отстранувајте ги семките. Додајте вода за да не добиете многу густ сок. И за крај, направете план за балансирана исхрана и слободно вклучете по некој цеден сок тука и таму, без да ги заборавите горенаведените информации.
