Ризици од сериозни заболувања како резултат на неправилно користење и одржување на клима уредите

Клима уреди – спас од горештините или нужно зло?

Со доаѓање на летните денови и високите температури животот во топлите краишта станува незамислив без секојдневна употреба на клима-уреди, дома, во автомобил или на работното место. Сепак, и покрај олеснувањето кое го носат, климатизерите треба да ги третираме како нужно зло и правилно да ги употребуваме и одржуваме. Несоодветната употреба и нередовното одржување на системите за климатизација, може да предизвика здравствени тешкотии, па дури и посериозни заболувања. Докажано е дека долготрајниот престој во климатизирани простории ги влошува симптомите на артритис и воспаленијата на синусите, а зачестена е и појавата на грип, настинки и воспаленија на дишните патишта. Во климите се собираат прашина, влакна, бактерии, вируси и габи, кои не само што предизвикуваат лош квалитет на воздухот и непријатна миризба туку можат да доведат и до низа болести.

„Производителите и лекарите се согласуваат дека е многу важно клима-уредот темелно да се исчисти еднаш годишно најдобро кон крајот на пролетта. Со чистењето се спречува појавата и размножувањето на бактериите и другите микроорганзими. Климата во автомобилот сервисирајте ја најмалку на секои две години. “

 Најопасна бактерија што демне од нередовно одржуваните клима-уредите е т.н. Legionella pneumophilla која предизвикува воспаление на белите дробови, познато како легионерска болест. Истата се пренесува со вдишување на ситните капки од клима-уредот, обично ги погодува повозрасните лица, посебно оние со хронични заболувања на бубрезите, срцето и белите дробови, како и лицата со ослабен имунитет, пушачите и алкохоличарите. Три пати почесто заболуваат мажите а може да биде и смртоносна особено за постарите и имунокомпромитирани лица. Симптомите на оваа опасна болест се многу висока температура над 40 степени, чувство на студ, кашлица, болка во градниот кош, главоболка, малаксаност и дијареја. Единствена терапија се силни антибиотици.

Како да ги намалиме ризиците од заболувања поврзани со користење на климатизери?

Основна превенција на инфективните заболувања асоцирани со лошо одржување на системите за климатизација е редовно чистење на клима-уредот и миење и замена на филтрите.

Производителите и лекарите се согласуваат дека е многу важно клима-уредот темелно да се исчисти еднаш годишно најдобро кон крајот на пролетта. Со чистењето се спречува појавата и размножувањето на бактериите и другите микроорганзими. Климата во автомобилот сервисирајте ја најмалку на секои две години.

Освен темелното чистење многу е важно правилно да се користат клима уредите. Ова подразбира истите никогаш да не ‘’дуваат’’ директно во нашето лице, да бидат наместени на температура која не е значително пониска од надворешната и особено важно пред напуштање на климатизираната просторија одредено време да се исклучи клима уредот со цел да не го изложуваме организмот на големи температурни шокови. Во однос на автомобилите, никогаш не влегувајте директно во ‘’врел’’ автомобил кој бил директно изложен на сонце поради опасност од топлотен удар! Потребно е најпрвин да се отворат сите прозори/врати и да се вклучи климатизерот за да се намали температурата барем 5 минути по што безбедно може да продолжиме со возењето.