Жените, за разлика од мажите, коишто биле генетски предиспонирани за заболување за Алцхајмеровата болест имале повисоко ниво на тау протеинот во нивната цереброспинална течност.
Истражувачите од Општата болница во Масачусетс, САД, објавија студија којашто ја третираше темата зошто жените се повеќе склони кон развој на Алцхајмерова болест отколку мажите.
Студијата којашто опфати 300 постари лица на коишто им биле направени ПЕТ-скенови (позитронска емисиона томографија) покажа дека жените имаат поголема веројатност да развијат токсични протеини во мозокот за кои се знае дека ја предизвикуваат болеста.
Како што е соопштено во списанието „JAMA Neurology“, ПЕТ-скеновите откриле дека жените во мозокот имале поголемо количество на протеините тау и бета-амилоид – коишто се главните создавачи на Алцхајмерова болест. Всушност, кога големи количини од овие протеини се агрегираат, тие се токсични за нервните клетки и предизвикуваат губење на меморијата и конфузија – симптоми со коишто се манифестира Алцхајмеровата болест.
Студијата би можела да помогне да се објасни зошто околу две третини од пациентите со Алцхајмерова болест се жени – што претходно се припишуваше на фактот дека жените живеат подолго од мажите и имаат повеќе време да ја развијат состојбата. Сепак, многу научници се сомневаа дека други механизми можат да придонесат за родовиот јаз во преваленцата на Алцхајмеровата болест.
Студијата се фокусирала конкретно на количината на тау протеини во мозокот на пациентите на просечна возраст од 74 години кои биле когнитивно здрави. Истражувачите претходно мислеле дека нема значајни разлики во нивоата на овие протеини во мозокот на мажите и жените, но потенцијалните разлики што се вклучени во патологијата на болеста стануваат сè поважен фокус во истражувањето на Алцхајмеровата болест.
Главниот автор на студијата, Реиса Сперлинг, вели дека наодите од оваа студија ги поддржуваат другите студии во идентификувањето на потенцијалните причини за разликите помеѓу мажите и жените и ризикот за заболување од Алцхајмеровата болест.
Некои претходни истражувања досега покажаа дека жените, за разлика од мажите, коишто биле генетски предиспонирани за заболување за Алцхајмеровата болест имале повисоко ниво на тау протеинот во нивната цереброспинална течност, а сегашната студија е првата што идентификува сличен модел кај клинички здрави поединци.
„Овие наоди даваат поддршка за сè поголем број научни студии што изложуваат биолошки поткрепувања за половите разлики во зголемениот ризик од Алцхајмерова болест“, вели Реиса Сперлинг.
