Консумацијата на додатоци како мултивитамините, витаминот Д, калциумот или витаминот Ц, не се штетни но истовремено, не обезбедуваат здравствени придобивки.
Најчесто употребуваните додатоци за витамини и минерали не обезбедуваат доследна здравствена корист или штета, сугерира нова студија предводена од истражувачите во болницата Свети Михаил и Универзитетот во Торонто.
Систематскиот преглед на постоечките податоци и испитувања објавени од јануари 2012 до октомври 2017 година, објавен неодамна во „Journal of the American College of Cardiology“, покажа дека најчестите додатоци – мултивитамините, витаминот Д, калциумот и витаминот Ц, не покажале никаква корист или дополнителен ризик во спречувањето на кардиоваскуларните заболувања, срцеви удари, мозочни удар или прерана смрт. Генерално гледано, витамините и минералите што се земаат како додатоци се земаат за да се додадат хранливите материи што се наоѓаат во храната.
„Бевме изненадени кога откривме многу малку позитивни ефекти од додатоците кои луѓето најчесто ги консумираат. Нашата студија откри дека ако сакате да користите мултивитамини, витамин Д, калциум или витамин Ц, тоа нема да ви наштети, но истовремено, нема ниту пак да ви обезбеди здравствени придобивки“, вели д-р Дејвид Џенкинс, водечки автор на студијата.
Студијата покажала само дека фолната киселина и витаминот Б со фолна киселина може да го намалат ризикот за заболување од кардиоваскуларни болести и добивање мозочен удар. Во меѓувреме, ниацинот и антиоксидантите покажале многу мал ефект што може да индицира зголемен ризик од смрт од било која причина.
„Овие наоди укажуваат на тоа дека луѓето треба да бидат свесни за додатоците што ги земаат и да се осигураат дека се применливи за специфичните недостатоци на витамини или минерали за коишто биле советувани од својот лекар“, потенцира д-р Џенкинс.
Неговиот тим ги разгледувал добиените резултати за додатоците кои ги вклучуваат витамините А, Б1, Б2, Б3 (ниацин), Б6, Б9 (фолна киселина), Ц, Д и Е; и бета-каротен; калциум; железо; цинк; магнезиум; и селен. Терминот мултивитамин во овој преглед бил искористен за опишување на додатоците кои ги вклучуваат повеќето витамини и минерали, наместо неколку одбрани.
Во отсуство на значајни позитивни податоци, освен потенцијалното намалување на ризикот од мозочен удар и срцеви заболувања во случајот со фолната киселина, истражувачите сугерираат дека е најдобро да се потпреме на здрава исхрана за да го добиеме потребното количество на витамини и минерали, бидејќи досега, ниту едно истражување не покажало нешто подобро од здрави оброци кои вклучуваат помалку преработена растителна храна, вклучувајќи зеленчук, овошје и ореви.
