koga-treba-da-go-preskoknete-treningot_image
Споделете со пријателите!

Понекогаш постојат сосема оправдани причини поврзани со здравјето заради кои треба да го прескокнете вежбањето.
Сигурно многупати сте се запрашале дали треба да го прескокнете тренингот. Дали да земете слободен ден, бидејќи едноставно чувствувате како да сте спремни да дадете сè од себе за да извежбате најдобро што можете. Многу нешта можат да влијаат на расположението и на желбата за вежбање, како стресниот работен ден, но понекогаш постојат и други сосема оправдани причини поврзани со здравјето заради кои треба да го прескокнете вежбањето. Некои од нив се следниве:

Чувствувате дека се разболувате

Доколку не се чувствувате добро, имате треска и болки во целото тело препорачливо е да останете дома да одморите и да го прескокнете вежбањето. Всушност се вели дека ако се чувствувате здрави од вратот нагоре, односно имате само затнат нос или незначителна болка во грлото, тогаш не е неопходно да го прескокнете тренингот, но ако се чувствувате лошо од вратот надолу, односно ако немате сила и чувствувате замор дури и по одењето од креветот до тоалетот, препорачливо е да одморите некој ден.

Во случај на настинка или грип вежбањето ќе ви одмогне, односно ќе направи да се чувствувате полошо бидејќи ќе ве истошти. Вежбањето кога сте болни не е добро и за оние околу вас бидејќи може да ги заразите доколку боледувате од одреден сезонски вирус.

Не сте спиеле добро претходната ноќ

Ова често им се случува на родителите со мали деца. Ако се будите неколку пати во текот на ноќта и треба да одлучите дали во текот на денот ќе го надокнадите изгубениот сон или ќе вежбате – во најголем дел од случаите спиењето победува.

Лошото и неквалитетно спиење ќе ве направи уморни и исцрпени, а кога сте во таква состојба вежбањето сепак не би имало добри резултати. Недостатокот на сон, исто така, ќе го зголеми воспалението во вашето тело, ќе го зголеми кортизолот и може да ве направи повеќе подложни на прејадување заради надокнадување на енергијата, како и поранливи на стрес.

Прочитајте:  Врската помеѓу сонот и стресот

Имате повреда

Физичката повреда може да биде многу фрустрирачка кога станува збор враќање во вежбалницата. Доколку сте се здобиле со било каква повреда и докторот ви препорачува да не вежбате додека не закрепнете во целост послушајте го неговиот совет.

Одвојте време да се одморите и да закрепнете правилно бидејќи ако се вратите на вежбањето порано отколку што треба може да ризикувате да предизвикате уште поголема штета. Во многу случаи, исто така, во зависност од повредата, докторот може да препорача умерено вежбање на останатите делови од телото. Оттука, ако имате незначителна повреда на раката и можете да правите вежби за долниот дел од телото консултирајте се со лекарот дали тоа би било во ред.

Се чувствувате дехидрирано или без многу енергија

Доколку имате симптоми на дехидратација, како главоболка, сува уста, вртоглавица и сл. пожелно е да го прескокнете вежбањето. Кога се вежба, честопати телото троши повеќе количество на вода отколку она што го складирало што може да предизвика електролитен дисбаланс.

Многу е важно неколку часа пред вежбањето да се фокусирате на добра хидратација на телото, како и на добра исхрана којашто ќе вклучи здрави масти, протеини и јаглехидрати коишто ќе ја обезбедат потребната енергија за квалитетен тренинг.

Вежбате прекумерно

Резултатите од вежбањето се јавуваат за време на одморот, а не за време на вежбањето. Ако не направите пауза од вежбање секоја недела, вашето тело нема да биде во состојба да го регенерира своето мускулно ткиво и да добие доволно енергија за следниот тренинг.

Барем 1-2 денови секоја недела се потребни за одмор и регенерација на мускулите и телото. Одморот, исто така, ќе ви помогне да избегнете истоштување на телото што може да резултира со настинки.


Споделете со пријателите!