Гумите за пливање на родителите им даваат лажно чувство на сигурност за нивните деца.
Забележуваме дека социјалните мрежи се преплавени од симпатични фотографии од слатки бебиња со надувани гуми околу вратот како лебдат во базен. Сте се запрашале ли колку се безбедни овие гуми за пливање наменети за новороденчињата постари од осум недели?
Педијатрите и медицинските експерти ги предупредуваат родителите за можните опасности на овој релативно нов тренд на користење гуми за пливање што се ставаат околу вратот на бебињата. Од Извршниот комитет на Американската академија за педијатрија велат дека гумите за лебдење во вода може да предизвикаат притисок врз вратот на бебето, што може да предизвика повреда на мускулите или лигаментите на вратот.
Многумина велат дека гумите за пливање на родителите им даваат лажно чувство на сигурност за нивните деца. Всушност, со гумите за пливање постои ризикот децата лесно да се превртат во водата или гумата да се лизне и да се извади од нивниот врат.
„Нема докажани придобивки од користењето на гумите на надувување околу вратот, а постои широк спектар на ризици поврзани со здравјето на бебињата“, вели Сара Дени, педијатар во одделот за итни случаи во Детската болница во Колумбус, Охајо.
Од Американската академија за педијатрија велат дека родителите треба да ги избегнуваат сите помагала за пливање на надувување. Тие ги советуваат родителите да не ги заменуваат спасувачките елеци со помошни средства за пливање, како што се гумите и мускулите бидејќи истите во секој момент можат да се дупнат и издишат. Имено, помагалата за пливање на надувување не се специјално дизајнирани да пружат безбедност и сигурност на малите деца.
Сè уште не постои објавено истражување кое конкретно ги проучувало трендовските гуми за пливање наменети за бебиња. Единствено во една студија од 2005 година во која била разгледувана терапијата за пливање кај доенчиња е наведено дека гумите за пливање не може да предизвикаат повреда, но во студијата не се разгледани дополнителни детали. Сепак, експертите и докторите по педијатрија потенцираат дека постои ризикот од повреди кај новороденчињата.
Сепак, гумите на надувување со кои новороденчињата би требало сигурно да лебдат во водата всушост не се одобрени и од страна на спасувачките екипи и инструктори по пливање ширум светот.
Од Асоцијацијата за пливање на САД во целост не ја поддржуваат употребата на гумените помагала за пливање. Наместо тоа, оттаму им препорачуваат на родителите да ги користат спасувачките елеци во процесот на учење на децата да пливаат и да бидат целосно вклучени во процесот со тоа што постојано ќе бидат во нивна близина додека се учат да пливаат. На негативните критики се приклучи и „Birthlight“, организација фокусирана на здравјето на бремените жени и новите семејства. Од организацијата ги стакнаа штетните ефекти што т.н. пловечки прстени може да ги предизвикаат врз физички, невролошкиот и емоционален развој кај бебињата.
