Редовното истегнување помага да се подобри севкупната функција на мускулите
Стекнувањето флексибилност во вежбањето е многу важно за одржувањето на добрата форма и здравје, но често се занемарува. Бројни студии ги докажуваат краткорочните и долгорочните придобивки од разните типови на истегнување, вклучувајќи го и статичното истегнување, динамично истегнување и проприоцептивна невромускулна фацилитација (ПНФ). Но знаете ли кои се тие придобивки? Зошто треба да се истегнувате редовно? Во што помага секојдневното истегнување пред почетокот на вообичаениот тренинг?
Намален стрес
Хроничниот стрес може да предизвика голем број на несакани состојби и реакции во телото, вклучувајќи ги и зголемените чувства на анксиозност, замор и напнатост. Докажано е дека редовното истегнување ја намалува психичката напнатост и, кога истото е во комбинација со техники на дишење, може значително да помогне во намалувањето на анксиозноста и депресијата.
Намалена болка и вкочанетост
Прекумерната мускулна тензија може да го зголеми дискомфорот на телото. Сепак, многу истражувања докажуваат дека редовното статичко истегнување може да помогне да се намали вкочанетоста, да се намали степенот на болка (особено кај лица со хронична болка во вратот или грбот), како и да се намали фреквенцијата и сериозноста на мускулните грчеви.
Подобрено здравје
Редовно изведување на вежби за истегнување, како што е ПНФ истегнувањето, статичкото истегнување и практикување на физички активности како јогата можат да помогнат да се намали крвниот притисок, срцевиот ритам и брзината на дишењето, намалувајќи ги притоа физиолошките реакции на телото на стрес и мускулна тензија.
Подобрен опсег на движење
Различните видови на истегнување, исто така, може да помогнат да се зголеми неограниченото движење на главните зглобови на телото, вклучувајќи ги клучните области кои се создадени да бидат мобилни, како колковите и рамењата.
Подобрена функција
Како резултат на лошата положба на телото, несоодветната телесна механика и поминување на долг период во седечка положба, мускулите во телото можат да станат хронично напнати, цврсти и контрактирани, што може да предизвика да бидат и помалку силни и еластични. Редовното истегнување помага да се подобри токму севкупната функција на мускулите, обезбедувајќи му на телото поефикасно да одговори на стресовите наметнати од различни видови на физички активности.
Намален ризикот од повреда
Пронајдени се ветувачки наоди во врска со тоа како истегнувањето може да помогне да се намали ризикот од повреда. Динамичните вежби за истегнување често се користат како дел од загревањето за да се зголеми температурата на телото и да се подготви за движењата кои следат во текот на тренингот. Како резултат на тоа, истегнување всушност се смета дека е клучно во превенцијата на повредите, бидејќи кога мускулите и тетивите во телото се студени веројатноста за затегнатост или повреда е поголема.
Подобрен проток на крв и циркулација
Редовното истегнување може да помогне да се подобри протокот и циркулацијата на крвта, со што се овозможува подобрување на транспортот на кислород и крвта богата со хранливи материи низ сите делови од телото.
