Во Велика Британија 3 милиони луѓе или 5% од популацијата страдаат од уринарна инконтиненција
Уринарна инконтиненција е неволево испуштање на урина. Тоа е неспособност да се задржи урината во мочниот меур затоа што контролата врз уринарниот сфинктер е слаба или изгубена. Во Велика Британија е проценето дека најмалку 3 милиони луѓе или 5% од популацијата страдаат од уринарна инконтиненција. Што се однесува до симптомите, некои луѓе имаат повремени протекувања на урина а кај некои оваа појава е почеста.
Има повеќе видови на уринарна инконтиненција
Стрес инконтиненција е кога урината протекува кога ќе се изврши притисок врз мочниот меур со кашлање, кивање, смеење или вежбање. Ургентна инконтиненција е кога кога има ненадејна, интензивна потреба за мокрење, придружена со неволево испуштање на урина. Ургентната инконтиненција може да биде резултат на инфекција, невролошко нарушување или дијабетес. Overflow инконтиненција е неможност потполно да се испразни мочниот меур што води кон преполнување односно доистекување на урината. Мешана инконтиненција имаме кога се присутни повеке видови на инконтиненција.
Лекови кои се избор при третман на уринарна инконтиненција се антихолинергици-антимускариници. Овие лекови ги олеснуваат симптомите кај синдром на прекумерно активен мочен меур и кај ургентна инконтиненција. Во оваа група лекови спаѓаат: солифенацин, оксибутинин, дарифенацин, толтеродин, фесотеродин и троспиум. Алфа блокатори се уште една група на лекови кои се користат при оverflow инконтиненција, тие ги релаксираат мускулите на мочниот меур и простатата и го олеснуваат празнењето. Претставници на оваа група се тамсулосин, алфузосин, силодосин, теразосин и доксазосин. Доколку фармаколошката терапија не помага, се пристапува хируршки. Би напоменал некои од хируршките процедури :
- Слинг техники со кои се зајакнува сфинктерната мускулатура (при стрес инконтиненција).
- Хируршко решавање на состојбата која довела до инконтиненцијата (за останатите типови на инконтиненција) – аденомектомија (отворена или ТУР), фистулектомија, решавање на конгенитални малформации.
- Реконструкција на везикоуретралната поддршка на карличното дно и други.
За олеснување на симптомите се препорачува и промена на животниот стил и диететски мерки. Намалување на алкохол, цигари и кофеин – кои го дразнат мочниот меур, пушачите повеќе кашлаат и поради тоа се склони кон стрес инконтиненција, намалена употреба на лекови- антихипертензиви, диуретици, седативи, антидепресиви. Намалување на телесна тежина – дебелите жени се склони кон стрес уринарна инконтиненција. Се препорачува намален внес на течности (пред спиење) и намалување на тешки физички активности. Тренинг на мочен меур кој вклучува планирано мокрење на секои 2-3 часа и физикална терапија со Кегелови вежби и електростимулација.
Д-р Благоја Здравев, специјалист уролог
