Настинка и грип – знаете ли да ги разликувате?

Информирајте се како да ги разликувате грипот и настинката и дознајте ги најчестите заблуди за нивното појавување и третман

Овој период од годината го означува и почетокот на поладно и променливо време, коешто води до појава на вируси и настинки. Настинката и грипот многумина не знаат да ги разликуваат, а непознавањето води кон несоодветен третман а со тоа и лечењето ќе биде без ефект. Околу лечењето на своја рака постојат многу заблуди коишто толку многу се распространети што многумина се убедени дека се точни а всушност не се. Симптомите на настинка и грип се слични. И двете состојби ги предизвикуваат вируси кои ги напаѓаат дишните патишта, но имаат и неколку клучни разлики. Преку одредување на симптомите, откријте кои се нивните сличности и разлики.

Настинка

Типични симптоми на настинка се: затнат нос или течење воден секрет од носот, чувство на гребење на грлото, главоболка, болка во грлото, кивање, умерена сува кашлица (но може и да ја нема), благо покачена температура, која најчесто е поретко изразена и тоа кај деца и постари и изнемоштени лица. Настинката вообичаено поминува за една недела и не е толку сериозна состојба како грипот, иако некогаш може да доведе до компликации: воспаление на средно уво, најчесто кај децата или секундарна батериска инфекција. Во овие случаи, задолжително обратете се на лекар, а доколку се изразени само симптомите на настинка, соодветен препарат капки за нос ќе ги ублажи симптомите и ќе помогне да се чувствувате подобро. Воедно, растворот ќе го намали отокот на носната слузница и секреција од носот. Така се олеснува дишењето преку носот и се ублажуваат другите придружни знаци на настинката.

При настинка не е задолжително да седите дома, бидејќи телото не е изнемоштено. Секако, може да одлучите да не излегувате од дома за да не го пренесете вирусот на другите. Запомнете, лицата кои имаат настинка, истата можат да ја пренесат на други, од вториот до третиот ден од појавата на симптомите на болеста.

Грип

Првичното чувство на грип, најописно и народски кажано, е како да ве удрил камион, бидејќи неговите симптоми не ги зафаќаат само дишните патишта, туку симптомите на грипот се распространети низ целото тело.

Грипот настанува нагло и брзо (може да се развие и за неколку часа) и трае помалку од една седмица. Симптомите, коишто варираат во индивидуални случаи, најчесто се: висока температура со траење од неколку дена над 38 степени, продуктивна кашлица, долготрајна главоболка, болка во мускулите, замор кој трае неколку недели и изразена исцрпеност. И грипот може да доведе со компликации, посериозни од настинката како гнојни воспаленија на крајниците како и воспаление на белите дробови. Грипот може ефикасно да се третира доколку е во почетна фаза, односно во првите 48 часа. Симптомите спонтано се повлекуваат во рок од 7 дена. Доколку сте болни подолго од 7 дена и имате висока температура, болни жлезди на главата, отежнато дишење и изразена кашлица, задолжително посетете лекар.

„Информирајте го лекарот за симптомите и текот на болеста, за постоење на посебни здравствени состојби – бременост, хронични заболувања како на пример: дијабетес, астма, срцеви болести и сл.“, истакнуваат од Институтот за јавно здравје на РМ.

Заблуди поврзани со грипот и настинката

• Антибиотик против грип. Антибиотиците делуваат врз бактериските инфекции. Грипот е вирус на не бактериска инфекција, па така антибиотиците не делуваат врз грипот. Исто така, многумина земаат антибиотици превентивно за да не се разболат, што е голема грешка која може да има сериозни последици. Последици настануваат кога ќе добиете бактериска инфекција, можно е таа да биде отпорна на антибиотици и да не можете да се излекувате. Од друга страна пак, бактериска инфекција може да се појави како компликација од грипот па препорачливо е симптомите да ги провери вашиот лекар;
• Ако ви застуди, сигурно ќе настинете. Ако излезете надвор со водена коса или ви било многу ладно додека сте биле надвор, сигурно ќе настинете. На ова многу често тврдење, кое е всушност заблуда, му се спротивставуваат многу истражувања и лекари, кои уверуваат дека грипот и настинката немаат врска со водена коса. Настинките и грипот се јавуваат кога времето е поладно, но тоа нема врска со зголеменото чувство за студ, туку со навиките. Односно, во студените месеци од годината, луѓето поминуваат повеќе време во затворен простор и на тој начин полесно доаѓаат во контакт со вируси;
• Ако немате температура, тогаш не ширите зараза. Ова не е точно, бидејќи настинката и грипот во првите денови може да не ги покажуваат симптомите;
• Ако имате настинка, таа ќе премине во грип. Според Институтот за здравје, грипот и настинката се предизвикуваат од различни видови на вируси, па така, настинката не може да премине во грип;
• Периодов веќе имав грип, сигурно нема да се разболам повторно.

Откако ќе се заразите со вирус на грип не сте имуни на вируси. Зошто? Од едноставна причина бидејќи постојат многу различни типови и може повторно да се заразите, од друг тип на вирус.