Од овој синдром патат успешни и талентирани личности
Доколку се потценувате и сметате дека не сте доволно способни за работата што ја работите, знајте дека не сте сами. Многумина, најчесто многу успешни и талентирани личности размислуваат токму така. Бидејќи е чест, овој начин на размислување има свое име и се нарекува Синдром на измамник. Синдромот на измамник е оној внатрешен глас кој ви кажува дека нештата не се такви како што изгледаат и дека никој не е таков каков што се претставува.
Овој синдром најчесто се јавува кај перфекционистите и кај оние кои што постојано се споредуваат со професионалниот успех на другите.
Овие личности не можат да се утешат со реалната слика која е спротивна од нивното ниско мислење за себе и не ги признаваат своите успеси. На пример, доколку им понудат унапредување, тие ќе започнат да градат нереално високи очекувања, размислување кое неминовно носи голем стрес. Работните грешки ги доживуваат многу лично и тие ги тераат да мислат за себе дека се неспособни и измамници. Луѓето кои патат од овој синдром не сметаат дека за својот успех се заслужни самите тие и нивните вештини, туку мислат дека станува збор за надворешни влијанија и околности. Иако е наречен синдром, оваа состојба не е медицински синдром туку емотивна тежина од која повеќе патат жените, но и голем број на мажи.
