Сакате да патувате и воопшто не се плашите од летање, мачнини, стомачни тегоби и вируси. Сепак, бидете подготвени дека при средба со нова средина, може да се разболите од…разочарување
На прагот на патувањата и летните одмори, добро е да се информирате дека токму патувањата можат да го нарушат вашето менталното здравје. Сте слушнале ли за состојбата која ги зафаќа туристите кои што ја посетуваат Италија, наречена Стендалов синдром?
Стендалов синдром познат уште и како Фирентински синдром е психосоматско нарушување предизвикано од естетски шок, односно преголемо воодушевување од уметност и уметнички дела со голема уметничка вредност.
Своето име го добива од францускиот писател Стендал, кој во една од своите книги прв го опишал овој феномен за време на својата турнеја низ Италија во 1817 година. Тој го опишал силниот емотивен стадиум што го доживеал откако ги видел најголемите дела на уметноста. Чувството како „животот да го напушта заради големата убавина“ било проследено со забрзано срцебиење.
Интересен е податокот дека овој синдром ги зафаќа само оние туристи кои што ја посетуваат Фиренца и тој дел од Европа. Сериозните манифестации на ова нарушување опфаќаат обилно потење, тахикардија и болки во стомакот, во комбинација со еуфорија и конфузија. Нападот може целосно да го измести чувството за стварност, а најризична група се сметаат оние туристи кои што патуваат сами.
