Понекогаш кај новороденчињата може да се појават некои чудни и збунувачки појави за коишто мајките вообичаено не се подготвени.
Денеска жените го користат секој момент од својата бременост за подготовка на секоја недела и месец од бременоста, големиот ден на пристигнување на новороденчето, како и за сè она што ќе се случува по пораѓањето.
Овие подготовки подразбираат постојано читање книги, списанија и веб-страници посветени на мајката и бебето каде што жените ги наоѓаат одговорите на своите прашања. Барем на повеќето од нив. Но што се случува кога за некои ситуации нема одговор во книгите? Понекогаш кај новороденчињата може да се појават некои чудни и збунувачки појави за коишто мајките вообичаено не се подготвени. Тогаш кај нив може да се создаде паника и тие да не знаат како да постапат. Но за многу од овие појави, всушност, нема потреба од создавање на паника бидејќи тие може да бидат сосема нормални за текот на развојот и растењето на бебето.
Во продолжение ќе објасниме неколку од овие појави.
Теменица (себороичен дерматитис)
Иако не се знае точната причина за појавата на теменица или сербоичен дерматитис на главата на бебињата, истата е многу честа појава. Добрата вест е тоа што оваа сувост или корупки на главата на вашето бебе вообичаено исчезнуваат во првите неколку месеци по раѓањето. Во меѓувреме, обидете се да втриете бебешко масло на зафатените места два или три пати неделно.
Вообичаено, оваа појава не би требало да предизвика загрижување кај родителите бидејќи станува збор за осип на главата на бебето кој ќе се изгуби по одреден период. Но доколку забележите дека осипот не поминува, се шири надвор од скалпот на бебето или ви се чини дека станува посериозен, консултирајте се со вашиот доктор.
Чудни звуци на плачење и кенкање
Ако очекувавте само малку кенкање и повремен бебешки, размислете повторно. Од бебето може да слушнете мрморење, стенкање, кенкање, плачење и многу други смешни или чудни звуци. Но сите тие чудни звуци се предизвикани од носните канали на бебето кои се прилично тесни по раѓањето и од слузта што се заглавува во нив создаваат некои необични звучни ефекти. Оттука, доколку секојдневно слушате симфонија од различни звуци, не се грижете, туку поминете повеќе време чистејќи го носот на бебето со назален аспиратор.
Постојано кивање
Не заборавајте дека новороденчињата кои штотуку дошле на овој свет се многу чувствителни на сите нешта наоколу на коишто вие веќе сте имуни. Оттука, доколку вашето бебе почесто кива, а всушност не е болно, тоа најверојатно се обидува да ги отстрани сите мали честички кои се пробиле во неговите носни канали.
Гледањето на светлината, исто така, на почетокот ќе претставува прилагодување, па ако забележите дека вашето бебе започнува да кива кога ќе го прошетате преку ден, сонцето е она коешто треба да се обвини. Други чести причини за кивање може да бидат одлободување од екстра слуз или, дури, од плодова вода од респираторните дишни патишта.
Доколку кивнувањата на бебето се придружени со отежнато дишење, консултирајте се со вашиот доктор за да се провери дали тоа може да биде алергија или некоја друга состојба за којашто ќе биде потребна терапија.
Случајни движења и грчеви
Случајните непредвидливи грчеви кај бебињата се вообичаена појава во текот на првите месеци по раѓањето. Во првите месеци, бебето се соочува со многу промени во развојот, од кои една може да биде и Моровиот рефлекс. Овој рефлекс е многу чест кај бебињата и предизвикува бебето да се здрви, нагло да ги крева рацете и да ги истегнува колената нагоре и потоа да ги врати рацете до телото. Можеби ќе забележите дека ова се случува случајно или можеби откако бебето ќе чуе гласен шум, но во секој случај Моровиот рефлекс е сосема нормална појава и трае неколку секунди и вообичаено се губи во периодот околу 3 или 4 месец.
Искривени очи
Во првите месеци по раѓањето, бебињата сè уште се обидуваат да ги откријат сите нивни способности, вклучувајќи го чувството за гледање. Оттука, е нормално кај бебето да се појави нерамномерност во очите бидејќи често е потребно извесно време за да се добие мала контрола на очните мускули со цел очите да се навикнат на фокусирањето.
Сепак, доколку забележите дека вашето бебе сè уште покажува знаци на искривување кај очите и по 6 месеци, треба да се консултирате со вашиот доктор, бидејќи некои симптоми може да бидат знак за страбизам или мрзеливо око.
