Кај три до пет отсто од вкупно 250.000 граѓани откриен дијабет
Откриен е дијабет кај три до пет отсто од вкупно 250.000 граѓани кои биле посетени од медицински екипи во домашни услови во изминатите три години преку проектот „Домашна визита“. Новооткриени пациенти со зголемени нивоа на маснотии се околу два процента од вкупно посетените.
Генерално, со проектот овозможуваме повозрасните лица да направат контролен преглед на крвниот притисок или нивото на шеќер во крвта во домашни услови, без да треба да се оптоваруваат да патуваат до матичните доктори, рече на прес конференцијата министерот за здравство Никола Тодоров.
Во неколку случаи се детектирани пациенти со многу високи вредности на шеќер во крвта, при што веднаш се повикува Итната медицинска помош, а пациентот се транспортира во најблиската болница со цел навремено интервенирање.
Во реонот на Здравствен дом Скопје, најчести дијагнози кои ги детектирале патронажните тимови се кардиоваскуларните заболувања, за кои на пациентите им биле дадени совети за практикување здрави стилови на живот.
Како исклучително позитивен пример со проектот го наведе случајот кога бил спасен живот на повозрасна пациентка кај која патронажниот тим констатирал многу висок притисок , околу 220-230. При разговор со семејството било констатирано и дека пациентката извесно време има бубрежна инсуфициенција, по што веднаш била повикана Итна медицинска помош, била дадена потребната терапија и практично бил спасен животот на пациентката…
Преземено од: Министерство за здравство на Република Македонија
