Физички-активните возрасни лица имаат помал ризик од депресија и други нарушувања.
Редовната физичка активност е од голема важност за жените кои се соочуваат со менопауза. Таа е важна транзиција во животот на жената и треба да се користи како потсетник за жената добро да се грижи за себе.
Зошто да започнете со вежбање за време на менопаузата?
Вежбањето за време и по менопаузата нуди многу предности, вклучувајќи:
Спречување на зголемување на телесната тежина
Жените имаат тенденција да ја изгубат мускулната маса и да добијат абдоминална маст во периодот на менопаузата. Оттаму, редовната физичка активност може да помогне во спречувањето на зголемување на телесната тежина.
Намалување на ризикот за заболување од рак
Вежбањето за време на и после менопаузата може да помогне во одржувањето на доброто здравје и нормалната тежина, која може да ја заштити жената од разни типови на рак, вклучувајќи рак на дојка, дебело црево и ендометријален карцином.
Зајакнување на коските
Вежбањето може да го забави губењето на коскената маса после менопаузата, што го намалува ризикот од фрактури и остеопороза.
Намалување на ризикот за заболување од други болести
Зголемувањето на телесната тежина за време на менопаузата може да има сериозни ефекти врз здравјето на жената. Вишокот на тежината го зголемува ризикот од срцеви заболувања и дијабетес тип 2. Редовните вежби можат да помогнат во намалувањето на овие ризици.
Подобрување на расположението
Физички-активните возрасни лица имаат помал ризик од депресија и други нарушувања.
Како вежбањето влијае на симптомите на менопаузата?
Малото зголемување на тежината или страдањето од прекумерна тежина некогаш може да бидат поврзани со топли бранови. Вежбањето не е докажан начин за намалување на симптомите на менопауза, како што се топлите бранови и нарушувањата на спиењето. Меѓутоа, редовното вежбање може да помогне да одржите здрава тежина, да го намалите стресот и да го подобрите квалитетот на животот.
Кои се најдобрите физички активности за практикување во периодот на менопауза?
Аеробна активност
Аеробната активност може да помогне да се отфрлат вишокот килограми и да се одржи здравата и нормална тежина. Се препорачува е да се започне со брзо одење, џогирање, велосипедизам или пливање. Ако сте почетник, почнете со 10 минути на ден и постепено зголемувајте го интензитетот и времетраењето на вежбите.
Зајакнување на мускулите
Вежбите за зајакнување на мускулите може да помогнат во намалувањето на телесната маст, зајакнувањето на мускулите и забрзувањето на процесот на согорување на калориите. Пробајте со вежби на справи за тежина или рачни тегови.
Истегнување
Растегнувањето може да помогне да се подобри флексибилноста на телото и мускулите. Одвојте доволно време за да се истегнете по секој тренинг, кога вашите мускули се сè уште топли.
Стабилност и рамнотежа
Вежбите за рамнотежа ја подобруваат стабилноста и можат да помогнат во спречување на падови. Пробајте едноставни вежби, како што е стоење на една нога. Активностите како таи чи, исто така, може да бидат корисни.
Како да останете мотивирани?
Поставете реални и остварливи цели. Наместо да се напрегате да вежбате што е можно повеќе, направете распоред за вежбање што ќе одговара на вашиот стил на живот. Многу активности, како што се танцување и градинарство, исто така можат да го подобрат здравјето.
