„Вегануари“ е интернационална иницијатива што има за цел поттикнување луѓето да го практикуваат веганскиот начин на исхрана во текот на месецот јануари
Веганството е начин на исхрана што се заснова на растителна храна. За разлика од вегетаријанството во коешто се исклучува консумирањето на месо и месни производи, веганството во потполност ги исклучува сите производи од животинско потекло, вклучувајќи ги јајцата, млекото, млечните производи и медот. Имено, веганите консумираат овошје, зеленчук, житарици и мешунки, а не јадат месо, морски плодови, млеко, млечни производи, мед и сè останато од животинско потекло. Зборот веган е за прв пат употребен во Англија во 1940-та со идејата да се направи разлика помеѓу вегетаријанците што јаделе храна од животинско потекло и оние коишто целосно ја отфрлале.
„Вегануари“ е глобална организација, основана во Британија во јануари 2014 год., којашто има за цел поттикнување и подржување на луѓето низ целиот свет да го практикуваат токму веганскиот начин на исхрана во текот на месецот јануари.
„Зошто да бидете вегани“ и „Како да станете вегани“ се двата слогани под кои работи организацијата „Вегануари“. Преку различни кампањи и настани ширум светот, поддржувачите на „Вегануари“ се стремат кон подигнување на свесноста кај луѓето за животните, животната средина и личното здравје со идејата да бидат вегани во јануари.
Основачите на организацијата, Џејн Ленд и Метју Гловер, велат дека „Вегануари“ е иницијатива посветена на општо информирање за веганството како начин на исхрана што се заснова на растителна храна, како и на поддршка и советување на луѓето коишто имаат желба да станат вегани. Од организацијата сметаат дека веганството е еден од најефективните лични избори коишто човекот може да ги направи ако сака да го подобри своето здравје и да ги заштити животните и Земјата.
Околу 50,000 луѓе ширум светот оваа година се придружија да дадат поддршка на едно-месечната интернационална кампања на „Вегануари“ со тоа што ја отфрлија консумацијата на месото, рибата, млекото, млечните производи и медот од своето јануарско мени.
