Наместо вообичаеното седење, ова истражување го поткрепува стоењето за време на часовите
Училиштето нè врзува со убави спомени и пријателства. Сите се сеќаваме на училишните клупи и знаењето кое сме го добиле седејќи токму на тие места. Но, што ако наместо клупи за седење сме имале клупи за стоење? Дали тогаш нашите резултати и однесувањето во училиште би се подобриле? Одговор на овие прашања може да даде едно интересно истражување на оваа тема.
Според истражувањето, учениците покажале подобри когнитивни резултати стоејќи за време на часовите, наместо стандардното седење.
За потребите на ваквите испитувања, во училниците биле поставени клупи за стоење покрај постоечките клупи за седење и учениците имале избор каде ќе седнат, а истражувањето било спроведено врз тие ученици кои ги користеле клупите за стоење. Биле тестирани средношколци запишани во прва година. Целта била да се проценат нивните когнитивни способности преку неколку компјутеризирани тестови два пати во текот на годината. Тестовите ја проценувале нивната способност за анализирање која е директно поврзана со способноста за меморирање и разбирање на факти, организирање на мислите и решавање на проблемите.
Истражувачите ги следеле промените во мозокот на учениците додека тие ги решавале тестовите со помош на т.н. functional near-infrared spectroscopy. Според резултатите кои биле забележани, континуираната употреба на клупите за стоење за време на наставата покажала значајни резултати кога когнитивните способности на учениците се во прашање. Наставниците уште претходно имале забележано значаен напредок во однос на вниманието и однесувањето на учениците на часовите при користење на клупи за стоење.
Стоењето за време на час е промена што можеби доста голем дел од учениците со задоволство би ја прифатиле. Иако се потребни дополнителни истражувања на оваа тема, кој знае, можеби еден ден во нашите училишта ќе имаме токму вакви клупи за стоење.
