Снегот веќе падна, а со него доаѓа и обврската истиот да се исчисти. Но, што ако ова може да биде опасно по здравјето?
Снегот пристигна заедно со радостите кои ги носи. Но сепак, треба и да се исчисти. Иако навидум чистењето на снегот пред вашата куќа или зграда не е штетно по здравјето, размислете уште еднаш. Можеби за повеќето луѓе навистина нема да има некои сериозни последици, но и тоа како може да биде опасно за луѓето кои имаат срцеви проблеми. Ладното време и физичкиот напор можат да бидат лоша комбинација затоа што срцето се оптоварува, па затоа најдобро би било да се избегнува тежок физички напор.
Тешката лопата полна со снег или пак одењето низ наталожениот снег се сметаат за таков вид на физички напор кој може да го оптовари срцето.
Доколку имате срцеви проблеми добро е да ги знаете знаците кои укажуваат на срцев удар и да знаете што всушност претставува срцевиот удар. Понекогаш инфарктот е ненадеен и силен. Но најчесто, тој започнува бавно со блага болка и непријатност, па затоа многумина и не се свесни дека се соочуваат со инфаркт. Еве неколку знаци кои ќе ви укажат дека е најдобро да се обратите на лекар затоа што има шанса да доживувате удар:
- Чувство на непријатен притисок или болка во градите кое трае повеќе од неколку минути или пак поминува и повторно се појавува;
- Болка или непријатност во едната или двете раце, грбот, вратот, вилицата или желудникот;
- Недостаток на воздух кој може да е или да не е проследен со притисок во градите;
- Ладна пот, гадење или зашеметеност.
За да не дојде до овој краен случај, нареден пат кога ќе го чистите снегот се препорачува да ги следите овие совети:
- Правете чести паузи додека го чистите снегот за да не го преоптоварите срцето;
- Не јадете обилен оброк пред или после физичкиот напор;
- Користете мала лопата затоа што тешкиот снег може одеднаш да ви го крене притисокот додека ја кревате лопатата. Побезбедно е да кревате помала количина на снег повеќе пати отколку да кренете неколку големи лопати преполни со снег;
- Не пијте алкохол пред или веднаш после чистењето на снегот. Алкохолот може да ве залажи дека ви е топло и на тој начин не би го зеле во предвид дополнителниот напор кој телото го вложува само затоа што времето е ладно.
Доколку веќе имате проблеми со срцето, не вежбате редовно или ако сте во поодминати години консултирајте се со лекар пред да се одлучите да го чистите снегот.
Бидете свесни за опасностите од срцев удар и хипотермија. Веднаш повикајте итна помош доколку забележите некои од горенаведените знаци за срцев удар. Облечете се во повеќе слоеви топла облека и носете капа за да ја задржите топлината на телото и да не се соочите со хипотермија. Снегот е радост за децата и за сите други. Но, видовме дека чистењето на снегот може да биде опасно по здравје. Чувајте се и не се изложувајте на преголем напор. Доколку нешто сериозно се случи, повикајте итна помош за да ви помогнат во најбрзо можно време.
Уживајте во снежните денови.
