Лесен рецепт за сливи со маскарпоне надополнет со ананас со нане за инстант освежување
На овие темпратури сигурно не ви се готви многу, затоа рецептите за кои не треба многу време да се помине во кујната се идеален избор. Рецептот за сливите со маскарпоне, мед и нане е многу лесен, брзо се прави, а вкусот неверојатен. Ананасот со шеќер и нане е нешто што многу одамна го немам направено и не се сеќавам од која книга е. тогаш го правев со круши, ама овде може да се употреби било кое овошје, пробајте.
Сливи со маскарпоне
- 4 сливи, исечени на пола;
- 1 лажица шеќер;
- 1/2 шолја маскарпоне;
- 1 лажиче мед;
- свежо нане.
Наредете ги сливите во тавче со исечената страна нагоре, посипете ги со шеќерот и печете ги во рерна загреана на 250 степени, околу 5 – 10 минути, најблиску до горните греачи колку што може. Времето на печење зависи од сливите, колку се зелени или зрели, дали се од фрижидер или се на собна температура и од загреаноста на рерната. Не треба да се испечат до распаѓање, само малку да омекнат и шеќерот да се стопи. Додека сливите се печат, измешајте го маскарпонето со медот и исецкајте го нането. Оставете ги сливите малку да се оладат, па ставете по малку маскарпоне врз секоја половинка, посипете ги со ливчињата нане и послужете ги топли.
Ананас со нане
Овде нема некој рецепт. Исецкајте десетина свежи ливчиња нане и истолчете ги со малку шеќер (отприлика 1 лажица), со тоа посипете ги парчињата свеж ананас и уживајте во свежината од вкусови.
* рецептите со во целост преземени од ситно сецкано
