Првата трансплантација
на череп и скалп во светот [ВИДЕО]

Замислете да ги спојувате крвните садови со големина од 0,16 см под микроскоп со помош на минијатурни конци со половина од дијаметарот на човечката коса, користејќи алати со кои може да се направи квалитетен швајцарски часовник

Првата трансплантација на скалп во светот неодамна беше успешно спроведена во Тексас. Оваа операција траеше 24 часа, а беше водена од страна на голема екипа од доктори и хирурзи, предводена од Д-р Џеси Ц. Селбер – Jesse C. Selber од Центарот за рак при Универзитетот во Тексас – Cancer Center at the University of Texas и Д-р А. Осама Гејбер – A. Osama Gaber од Хустон Методистичката болница во Тексас – Houston Methodist Hospital. 55-годишниот пациент, програмер Џим Бојсен – Jim Boysen од Остин во Тексас, е првиот човек во светот кај кој успешно беше извршена парцијална трансплантација на череп и скалп, извршена истовремено со трансплантација на бубрези и панкреас.

Колку трансплантации може да издржи еден човек?

Џим пред точно 10 години беше дијагностициран со леиомиосаркома – редок вид на канцер што го напаѓа нежното мускулно ткиво на скалпот. Тој е еден од ретките пациенти болни од рак, кои успешно ја поминале хемотерапијата и радиотерапијата. Сепак, радијацијата драстично му го оштетила скалпот оставајќи лузна со големина од 25 на 25 сантиметри, којашто му се спуштала низ черепот се до мозокот. Лекарите откриле и дека неговите бубрези и панкреас исто така откажувале, како резултат на неговиот дијабет дијагностициран уште кога имал 5 години. Поради тоа овие два органи му биле трансплантирани за прв пат уште во 1992 година.

Реконструктивната пластична операција на неговиот череп и скалп, за хирурзите претставуваше повеќе од предизвик. Лузната на главата ги попречувала лекарите безбедно да ја спроведат трансплантацијата на бубрезите и панкреасот. Исто така, лошото функционирање на овие органи кај Џим, но и имуно-супресивните лекови што ги примал, претставувале потешкотија за лекарите да ја спроведат реконструкцијата на неговата глава.

И покрај овие пречки, Д-р Селбер пред четири години дојде до иновативна идеја со чија помош сите три операции би поминале без никакви проблеми: „Кога за прв пат го сретнав Џим, јас направив поврзаност помеѓу неговата потреба од нов бубрег и панкреас, но и лековите против одбивање што ќе ги поддржуваат овие операции, како и од неговата потреба од трансплантација на череп и скалп, која истовремено би била заштитена токму од истите лекови“, објаснува Д-р Селбер.

Трансплантацијата беше спроведена по пат на сложена микрохирургија

Џим беше опериран на 22 мај, 20 часа откако организацијата определена за набавка на органи за Северен, Јужно-источен и Западен Тексас наречена LifeGift, ги информирала хирурзите дека постои донатор на бубрег и панкреас, како и на череп и скалп со слична боја ја кожа и коса како на Џим. Д-р Мајкл Клебак – Michael Klebuc кој ја водеше пластичната операција на скалпот, објаснува колку била тешка оваа процедура: „Ова беше многу сложена операција бидејќи ние моравме да ги трансплантираме ткивата по пат на микрохирургија. Замислете да ги спојувате крвните садови со големина од 0,16 см под микроскоп со помош на минијатурни конци со половина од дијаметарот на човечката коса, користејќи алати со кои може да се направи квалитетен швајцарски часовник.“ Сите ткива се трансплантирани од ист дарител, а Д-р Селбер потврдува дека најтешкото во оваа прва во светот операција, била успешната соработка на две големи здравствени установи.

Покрај сложеноста на оваа реконструктивна операција кај овој пациент, таа заврши успешно. Џим Бојсен сега има нов 38 сантиметарски скалп и воодушевен е од резултатите: „Неверојатно е шокантно, навистина, колку добро тие го сторија ова“, изјави Џим за Associated Press. „Јас ќе имам повеќе коса отколку кога имав 21“, се воодушевува тој. Џим многу им е благодарен на сите хирурзи: „Јас сум воодушевен колку добро се чувствувам и доживотно сум благодарен дека имам следна шанса да се вратам на нормалниот начин на живот и да ги правам нештата што ги сакам и да бидам со луѓето кои ги сакам“.