Во првите месеци по породувањето, менструлните циклуси може да се неправилни, но со текот на времето вообичаено се вракаат во нормала.
Вообичаено менструалниот циклус на жената може да се промени откако таа ќе се породи. Некои жени по породувањето имаат менструални циклуси коишто се манифестираат со потешки симптоми како абдоминални болки и други непријатности, додека други сметаат дека нивните циклуси стануваат полесни.
Во првите месеци, менструлните циклуси може да се неправилни, но со текот на времето вообичаено се вракаат во нормала. Не постои начин да се предвиди како раѓањето бебе ќе влијае на менструалниот циклус на една жена, но кај жените коишто дојат обично се случува да циклусот да се врати по подолг период.
Што да очекувате од првиот менструален циклус откако ќе се породите
Бременоста и породувањето може да донесат големи промени кај телото на жената, од кои некои може да влијаат негативно и тогаш вообичаено е потребно време за телото да се опорави правилно. Не постои нешто како „стандарден“ постпартален менструален циклус, но вообичаено е за жената којашто се породила, првите неколку циклуси да бидат различни од оние коишто ги имала пред бременоста.
Постојат многу причини зошто менструалните циклуси може да се променат по породувањето и тие може да ги вклучат следниве:
- На матката ѝ треба време за да се врати во нормалната големина;
- Нивоата на хормонот се менуваат;
- Доењето влијае на нивото на хормоните.
Некои жени забележуваат дека нивните менструални циклуси се потешки по породувањето, други забележуваат дека имаат промени во однос на бојата на крвта или дека стомачните грчеви се поинтензивни. Според докторката Дајан Јанг од клиниката во Кливленд, повеќето жени ќе забележат дека нивниот период се враќа во нормала со текот на времето.
Кога вообичаено доаѓа првиот постпартален менструален циклус?
За жените коишто не дојат или коишто дојат со неправилен распоред, менструацијата има тенденција да се врати побрзо. Анализа од шест претходни студии во 2011 година покажала дека повеќето жени ги добиле своите први циклуси помеѓу 45 и 94 дена по раѓањето. Една студија во прегледот открива дека просечниот прв циклус се појавил на 74 дена по породувањето. Главниот фактор што влијае на времето кога ќе дојде првиот постпартален циклус е овулацијата. Мерењето на основната телесна температура секој ден може да помогне да се открие периодот на овулација.
Неправилни постпартални менструални циклуси
Вообичаено е жената да има неправилни менструални циклуси, особено во првите месеци по пораѓањето. Жените коишто дојат имаат поголеми шанси да забележат нередовни циклуси, бидејќи хормоните кои го поддржуваат доењето може да предизвикаат телото да ја одложи овулацијата или да овулира поретко. Дури и кај жените кои не дојат, циклусите може да се нерегуларни, бидејќи на телото му треба време да се опорави од бременоста и породувањето.
Со текот на времето, менструацијата ќе се врати како во периодот пред бременоста. Сепак, некои жени можеби имале нередовни периоди и пред бременоста, како што се оние со синдром на полицистични јајници или ендометриоза.
Разлика помеѓу лохија и менструација
Лохија или постпородилно крварење се случува по породувањето и вклучува неколкудневно или неколкунеделно крварење коешто се разликува од менструалниот циклус. Во текот на неколку дена или недели, крварењето добива сè посветла боја и на крајот исцедокот станува белузлав. Постпородилното крварење често е пропратено од грчеви бидејќи матката има контракции додека се враќа во првобитната големина.
Важно е да се напомене дека лохијата е различна од менструалниот циклус и тие не треба да се мешаат бидејќи лохијата е знак дека телото сè уште се опоравува од породувањето. Всушност, иако и лохијата и менструалниот циклус започнуваат со светла црвена крв, кај лохијата таа има тенденција да станува посветла со текот на деновите, додека кај циклусот да се затемнува.
Менструален циклус за време на доење
Жените кои дојат може да немаат постпартален менструлен циклус и неколку месеци, бидејќи доењето често ја спречува овулацијата и потоа менструацијата. Некои жени го третираат доењето како контрацептивен метод. Сепак едно истражување од 2015 година покажа дека од 11.1% до 39.4% од жените кои дојат имале барем една менструација во рок од 6 месеци по раѓањето.
Кога да се јавите за преглед кај доктор
Медицинскиот тим треба да ја советува жената за она што е вообичаено кога станува збор менструалниот циклус по породувањето. Типот на циклус и периодот во кој тој ќе се нормализира се разликуваат кај многу жени и зависат од начинот на кој тие ќе се породат, медицинската историја на жената и други индивидуални фактори.
Сепак треба да се консултирате со лекарот доколку забележите невообичаени промени и симптоми како:
- Многу тешки крварења;
- Крварење кое се јавува со треска;
- Интензивни грчеви;
- Згрутчување поголемо од голф-топка.
