Иако звучи нереално, но со помош на оваа направа се случува вистинско чудо
Животот на луѓето кои се соочуваат со инвалидитет не е воопшто лесен. Инвалидитет може да биде последица на повреда или болест. Луѓето кои се справуваат со ваквата состојба не можат да се движат, а понекогаш и не чувствуваат ништо во парализираниот дел од нивното тело. Тие можат да се движат единствено со помош на инвалидската количка која им овозможува пристап до многу места и им го олеснува социјалниот живот.
Но, со цел уште повеќе да им се олесни животот на тие луѓе, научниците продолжиле со работа. Денес, благодарение на истражувањата и напорната работа на група студенти под водство на нивниот професор, имаме направа со помош на која лицата со инвалидитет можат да се движат исправено, без да ја користат инвалидската количка. Станува збор за т.н. „SuitX’s Phoenix exoskeleton“.
Направата ја враќа мобилноста на нозете преку мали мотори кои ги придвижуваат колковите и колената. Човекот кој ја носи оваа направа може со помош на соодветни копчиња да го контролира движењето на нозете и да се движи со брзина од околу 1.5 км на час.
Ова неверојатно помагало е едно од најлесните и најдостапните медицински помагала за луѓето со инвалидитет. Направата има и некои специфични особености. На пример, таа е приспособлива на телото – на тежината, висината и на должината на нозете на човекот. Работи на батерии кои се носат во ранец на грбот и кои го напојуваат да работи во времетраење од 8 часа. Постои и апликација преку која би можело да се добијат информации за движењето на лицето кое ја користи направата.
Според луѓето кои се заслужни за овој изум, ова помагало го подобрува квалитетот на животот на парализираните луѓе, и иако не може да се направи нешто повеќе за самиот инвалидитет, сепак може да се подобрат последиците кои се резултат на постојаното седење. Тимот додава дека направата би можела да биде од корист и за луѓе кои претрпеле мозочен удар или пак доживеале некаква друга повреда. Ова е доста голем медицински напредок кој е од огромно значење за парализираните лица. Кој знае, можеби еден ден ќе биде достапен и на нашите простори.
