Зошто доаѓа до уринарни инфекции кај децата?
Уринарните инфекции се едни од најчестите инфекции кај децата. Доколку не се третираат навремено и правилно, може да доведат до оштетување на бубрезите. Најчеста причина за инфекција се бактериите кои нормално живеат во дебелото црево (Esherihia colli) а најчеста е инфекцијата на мочниот меур (циститис). Сепак за да дојде до воспаление потребно е бактериите да се размножат во доволен број за што треба да се исполнат одредени услови.Во летниот период вообичаено се зголемува фреквенцијата на уринарни инфекции најмногу поради долго време поминато во вода, седење во влажни костими за капење и посети на базени и спа центри кои во себе кријат бројни патогени. Останати причини за појава на уринарни инфекции кај децата се:
- нецелосно празнење на мочниот меур и одложување на нагонот за мокрење;
- слаб внес на течности;
- нарушени хигиенодиететски мерки (неправилно бришење);
- долго присутна опстипација;
- преладување – температурната иритација на мочниот меур;
- стрес и/или пад на имунитетот со што се олеснува пристапот на бактериите;
- вродени aномалии на бубрезите и уринарниот тракт.
Најчести симптоми и третман на уринарните инфекции кај децата
- Потреба за итно мокрење но истото е отежнато и болно.
- Печење и/или појава на крв при мокрење.
- Болка и/или грчеви во долниот дел на стомакот над срамната коска.
- Болки во долниот дел на грбот.
- Висока температура со треска е сигнал за акутна инфекција на бубрезите (пиелонефритис).
Лекувањето на акутни цистити се спроведува со давање антибиотици според антибиограм, внес на голема количина на течности и додатоци во исхрана на база на Д-Маноза во доза од 2г, најдобро во комбинација со пробиотици, бидејќи Д-манозата ја намалува концентрацијата на E. Coli а пробиотиците ги намалуваат штетните ефекти на антибиотиците (антибиотски асоцирана дијареа). Во случај на пиелонефритис при што детето е интоксицирано, дехидрирано, или не може да прима течности преку уста, неопходна е болничка нега и инфузиона терапија. Со тоа треба да се елиминира акутната инфекција и да се намали можноста за бубрежно оштетување. Во секој случај ординираната антибиотска терапија треба да се зема доволно долго, и тоа не само до исчезнување на клиничките симптоми туку до искоренување на инфекцијата преку ерадикација на причинителот, со цел да не дојде до појава на рецидиви.
Превенција на уринарните инфекции кај децата
Во превентивна смисла, кај осетливите деца, важно е да се спроведува соодветен хигиенодиететски режим кој подразбира: квалитетен ноќен одмор, внесување на 2-3л вода дневно, редовен внес на овошје а пред се: брусници, праски, јаболки, да не се одложува потребата за мокрење, да се врши комплетно измокрување со мускулна масажа, да се практикува хигиенско бришење после голема нужда (од напред према назад) итн.
