„Поевтино е да се спречи, отколку да се лечи“ и „Уште колку пациенти ќе носите на душа“ беа дел од транспарентите упатени кон надлежните во врска со најновата одлуката на Владата за кратење на буџетот за ХИВ
Граѓанските организации кои спроведуваат активности за превенција и рано откривање на ХИВ помеѓу групите изложени на најголем ризик во Република Македонија, денес, со протест пред Собрание на РМ, јавно побараа од пратениците, Владата, Министерството за финансии и Министерството за здравство да го коригираат скратениот буџет за заштита на населението од ХИВ – во согласност со препораките на експертите. Тоа ќе спречи појава на епидемија на ХИВ и ќе го заштити здравјето на сите граѓани. Тие поднесоа апел за пратеничка поддршка за зголемување на буџетот за превенција на ХИВ и спречување на епидемија, со образложение:
„Република Македонија е земја со ниска стапка на ХИВ-инфекција. Тоа е резултат на долгогодишните напори на национално ниво, како од страна на државата, така и од страна на граѓанскиот сектор.“ Со најновиот предлог-Буџетот на Република Македонија за 2017 година од само 27 милиони денари, ситуацијата во Македонија ќе се влоши, бидејќи (…) „со овој износ превентивните активности за ХИВ се ставени во ризик целосно да прекинат по јуни 2017 година, што ќе резултира со значително зголемен број на нови инфекции и смртни случаи“, стои во образложението.
Покрај апелот, за овој горлив проблем, загриженост изрази и господин Mark Dybil, извршниот директор на Глобалниот фонд за борба против СИДА, туберкулоза и маларија, со официјално писмо испратено до сите највисоки инстанци во Република Македонија.
„Ние веруваме дека овие намалувања ќе го загрозат продолжувањето на антиретровирусната терапија за луѓето кои живеат со ХИВ, а за кои истата е од животно значење, и ќе го сопрат финансирањето на сите активности за превенција, што е клучно за одржување на придобивките од програмата постигнати во Македонија во последните неколку години.“, стои во писмото.
Во анализата од 2015 година, која ја спроведе експертски тим на Светската банка во соработка со Министерството за здравство и домашни експерти, меѓу другото, стои и тоа дека: (…) „со фокус на клучните групи изложени на најголем ризик и зголемување на бројот на лица кои ќе бидат на терапија, би се превенирале дополнителни 860 нови инфекции и 290 дополнителни смртни случаи до 2030 година.
„Покрај тоа, Министерството за здравство јавно се обврза дека ќе ги одржи програмите за превенција преку мрежата на граѓанските организации на јавната расправа во Комисијата за здравство при Собранието на Република Македонија на 11 декември 2015 година.“- се заклучува во соопштението на Платформата за одржливост на сервисите за превенција и поддршка за ХИВ, сочинета од здруженијата: ХЕРА, ХОПС, ЗАЕДНО ПОСИЛНИ, ЕГАЛ, Доверба, СТАР-СТАР, Црвен крст на РМ, Опција – Охрид, Зона – Кавадарци, Центар за унапредување на јавен живот – Тетово, ХЕЛП – Гостивар, Младински Клуб – Штип, Избор – Струмица, ПУЛС – Куманово, Интер етник проект – Гостивар, Виа Вита – Битола.