Родителот треба да му чита книги за 12-годишна возраст на детето кога ќе биде на 10-годишна возраст зашто така кај него ќе се развие љубопитноста за учење нови нешта
Читањето на глас на децата на рана возраст без сомнение има многу позитивни страни. Тоа не само што овозможува развивање на когнитивните вештини кај децата уште пред да почнат да зборуваат, туку и помага во негувањето на нивната блиска врска со родителите. Едно истражување докажува дека колку повеќе родителите им зборуваат и читаат на своите деца на 8-месечна возраст, толку подобро ќе се развијат нивните јазични способности и речник на 3-годишна возраст.
Родителите вообичаено им читаат на своите деца сè додека тие не ги развијат сопствените когнитивни способности и научат да читаат за себе. Сепак, повеќе истражувања дознаваат дека, всушност, читањето на глас треба да продолжи да се практикува и по усовршувањето на јазичните способности и достигнување на флуидноста во читањето, отприлика до 14-та година. Еве пет причини зошто да му читате на глас на вашето дете.
Читањето ја развива детската љубопитност, фантазија и креативност
Според Џим Трелис, автор на книгата Read Aloud Handbook, способноста за читање кај децата не е еднаква со способноста за слушање сè до 13 или 14-годишна возраст. Тој потенцира дека токму заради ова родителите треба да им читаат на своите деца до крајот на основното училиште. „Родителот треба да му чита книги за 12-годишна возраст на детето кога ќе биде на 10-годишна возраст зашто така кај него ќе се развие и фантазијата и љубопитноста за учење нови нешта преку читањето“, вели Џим.
Читањето го проширува фондот на зборови кај детето
Докажано е дека книгите изобилуваат со зборови коишто детето вообичаено не би ги слушнало во секојдневната комуникација дома или на училиште. Станува збор за софистициран литературен речник што ретко се употребува дури и во телевизиските и радио-емисии што ги гледаме и слушаме. Оттука, доколку родителите го практикуваат читањето на глас уште на рана возраст ќе помогнат во развојот и проширувањето на речникот на зборови кои ќе ги користи детето.
Читањето го олеснува изучувањето на зборовите и нивното значење
Кога децата ќе научат да читаат вообичаено се соочуваат со потешкотиите да го научат вистинското значење и правилната употреба на зборовите со кои се сретнуваат. Со секојдневното читање книги на глас, родителот ќе му помогне на детето да го научи значењето многу повеќе, како и поретки зборови коишто понатаму ќе ги сретнува во училишните книги.
Читањето ја зголемува блискоста помеѓу родителот и детето
Предучилишната и училишната возраст кај децата се многу важни за развивањето на нивниот однос со родителите. Неизбежен е моментот кога родителот ќе забележи како полека неговото дете пораснало и повеќе сака да се дружи со соучениците отколку да се гушка него. Секојдневното читање на глас, барем еден час, ќе овозможи да ја негувате меѓусебната блискост и да создадете добра врска со вашето дете.
Читањето помага во емотивно-социјалниот развој кај детето
Преку читањето на книги со различни тематики, децата се развиваат на емотивен и социјален план. Читањето ќе поттикне поставување на различни прашата и дискусии што понатаму ќе му помогнат на детето да ги развие способноста да управува со своите чувства, идеи и воспоставувањето на врски со другите.
