Онлајн порнографијата и адолесцентите

Влијанието на онлајн порнографијата врз вредностите, однесувањето и ставовите на адолесцентите

Адолесценција има значајно место во процесот на формирање на идентитетот. Во овој животен период се оформува личноста која истражува свој начин да биде дел од општеството. Адолесценцијата започнува околу 12-тата и завршува во 18-тата година од животот. Користењето на интернет е многу погодна, воедно и лесно достапна алатка за тинејџерите. Имено, интернетот овозможува три есенцијални елементи за самодоверба: контрола на ситуацијата, одобрување од останатите и прифаќање од околината. Овие елементи ја објаснуваат желбата на адолесцентите да комуницираат исклучиво онлајн.

Бесплатноста, достапноста и анонимноста, овозможуваат содржините со порнографски карактер лесно да дојдат во контакт со деца.

Статистиките покажуваат дека уште од 15 години, децата имаат контакт со онлајн порнографија, случајно (28 проценти) или намерно (19 проценти). Според едно истражување, ова искуство го доживуваат со измешани емоции, вклучувајќи љубопитност, шок и конфузија. Помладите деца изјавувале дека се чувствуваат вознемирено и депресивно од она што го виделе.

Оние адолесценти коишто се почесто изложени на порнографски содржини, најмногу заради љубопитство, може да пројават знаци на ризично сексуално однесување, рано започнување со сексуални односи, погрешно перципирање на интимниот однос, искривена перцепција за самозадоволувањето, употреба на алкохол и дрога за време на сексуалниот однос, често менување на партнери и сл.

Едно шведско истражување ја испитувало употребата на онлајн порнографија од страна на адолесцентите, со цел да разбере на кој начин ја користат и како влијае врз нив. Осумнаесет учесници, 10 девојки и 8 момчиња ги кажувале своите мислења во индивидуални испрашувања. Биле дефинирани повеќе заклучоци. Најпрво, консумирањето на порнографска содржина го наметнува прифаќањето на традиционалните родови улоги: мажот е доминантен а жената потчинета; двојниот стандард – жена со повеќе партнери е промискуитетна, а мажот во истата улога е маж за пример; претставата (идеалот) за женското тело – девојката треба да биде слаба, помала и потчинета.

Што да се прави

Интернетот е клучен дел од животот на адолесцентите, па затоа родителите и наставниците треба да посветат големо внимание на едукација за сексуалното и репродуктивното здравје и тоа од млада возраст. Бидејќи не е само важно што се гледа на интернет, туку како се перципира таа информација. Така, доколку тинејџерот поседува сексуално образование, тој ќе препознае дека порнографската сцена не е реална и нема да има причина да ја задоволува љубопитноста на тој начин.