Резултатите од овие тестови покажале дека кога учесниците слушале музика додека ги извршувале задачите нивните перформанси биле значително намалени.
Музиката често се поврзува со креативноста. Но според една неодамнешна студија објавена во списанието „Applied Cognitive Psychology“ слушањето музика во позадина може да биде пречка за одредени видови на креативно размислување.
Тимот истражувачи од „Lancaster University“ и „University of Central Lancashire“ во Велика Британија и „University of Gävle“ во Шведска, сакал да ги тестира тврдењата на некои научници дека слушањето музика во позадина додека се работи ја подобрува креативноста.
Со оваа цел истражувачите спровеле експерименти со кои ја тестирале вербалната креативност на учесниците во студијата преку вербални задачи, познати како „CRATs“, кои обично се користат во психолошките истражувања за да го проучат креативното решавање на проблемите.
Имено, на 30 учесници на возраст од 19 до 30 години им биле дадени три зборови и тие требале да размислат за уште еден збор што би можел да ги поврзе сите дадени зборови, односно „flower“, „dial“, „dress“ – зборови коишто со додавање на зборот „sun“ формираат нови зборови, односно „sunflower“, „sundial“, „sundress“.
Учесниците ја извршувале задачата во различни амбиенти коишто биле или тивка просторија или:
- Просторија во која свирела песна на странски јазик;
- Просторија во која свирела инструментална музика;
- Просторија во која свирела музика со познати текстови.
Резултатите од овие тестови покажале дека кога учесниците слушале музика додека ги извршувале задачите, нивните перформанси биле значително намалени во споредба со експериментот кога задачите ги решавале во тивка просторија без музика.
„Најдовме цврсти докази за намалени перформанси на учесниците во студијата кои ги решаваа задачите со музика во позадина“, изјави Нил МекЛачи, автор на студијата од Универзитетот Ланкастер во УК.
Иако истражувачите не тестирале зошто ова може да се случи, тие сугерираат дека ефектот може да се појави, бидејќи музиката може да ја наруши нашата вербална работна меморија, поради што го отежнува исполнувањето на дадените задачи.
„Експериментот во кој учесниците биле изложени на музика со познати текстови покажал дека слушањето музика во позадина ја намалува ефективноста во решавањето на задачите познати како „CRATs“, без разлика дали таа предизвикала позитивно расположение или дали учесниците обично студирале во присуство на музика“, заклучуваат авторите во студијата.
