Внесувањето доволно протеини е важно, но внесувањето доволно протеини во правилно време е уште поважно.
На прашањето што им е потребно на нашите мускули за побрзо закрепнување и обновување по вежбањето, одговорот е доволно количество на протеини. Но внесувањето на протеини постојано отвора прашања на кои експертите и нутриционистите секојдневно одговараат. Во продолжение прочитајте ги одговорите на неколку прашања во врска со внесувањето на протеините на кои одговори Џејми Купер, професор на Катедрата за храна и исхрана на Универзитетот во Џорџија.
Колку протеини им се потребни на оние што вежбаат и на оние што не вежбаат?
Многумина сметаат дека колку повеќе вежбаат толку повеќе им се потребни протеини, што е вистина, но донекаде. „Всушност, зависи од тоа како гледате на внесувањето на протеини. Повеќето луѓе, без оглед на физичката активност, треба да внесуваат од 10 до 15 проценти од дневните калории од протеини. Но на спортистите им се потребни повеќе калории отколку на оние што воопшто не вежбаат.
Ако на протеините се гледа врз основа на проценти, тоа не е толку различно помеѓу оние што вежбаат и оние што не вежбаат. Доколку, пак се гледа во грамови, тогаш се забележува разликата. Оттука, точно е дека на оние што редовно вежбаат им е потребно поголемо количество протеини, но на нив исто им е потребно поголемо количество и од сè останато, вели Џејми Купер, професор на Катедрата за храна и исхрана на Универзитетот во Џорџија.
Препорачаната дневна количина на протеини за еден здрав, но неактивен човек е 0,8 грама на 1 килограм телесна тежина, што значи дека за човек со телесна тежина од просечни 68 килограми му се потребни околу 54 грама протеини. За спортисти, тој број е малку повисок, во зависност од тоа каков вид на спорт практикува и какви тренинзи прави. Сепак, општата препорака за активните е да се внесуваат од 1,2 до 2 грама протеини по килограм телесна тежина.
Кои фактори влијаат на внесувањето на протеини?
Целта на вашето спортување
Целта заради која вежбате е факторот што многу влијае на тоа колку од препорачаните од 1,2 до 2 грама протеини на килограм тежина треба всушност да ги внесувате доколку вежбате. Оттука, ако сте во групата на сериозни вежбачи што креваат големи тежини и вежбаат со цел да ја зголемат мускулната маса и силата треба да внесувате поголемо количество протеини, односно околу 2 грама на килограм телесна тежина. Доколку, пак, сте во групата на спортисти што редовно трчаат, возат велосипед или пливаат, треба да внесувате измеѓу 1,2 и 2 грама, а доколку не вежбате редовно, одите два, три пати неделно во теретана или на јога, рекреативно играте фудбал или кошарка, треба да внесувате од 1,2 до 1,5 грама протеини на килограм телесна тежина.
Времето кога ги внесувате протеините
Внесувањето доволно протеини е важно, но внесувањето доволно протеини во правилно време е уште поважно. Купер вели дека доколку сакате големи резултати од тренингот треба да внесете мало количество протеини пред вежбањето и мало количество протеини по вежбањето. Ова ќе придонесе за најголем пораст на синтезата на протеините, како и не само што ќе ви помогне да ја зголемите мускулната маса, туку и ќе му помогне на вашето тело побрзо да закрепне од тренингот.
Идеалната доза на протеини за пред и по вежбањето е од 6 до 20 грама. Таа истакнува дека, иако повеќето се фокусираат на исхраната и внесувањето на протеини по завршувањето на тренингот, всушност, се чини дека придобивките се најголеми од протеините што ќе се внесат пред вежбањето.
