Видеото што го обиколи светот а зборува за убавината
Човековиот живот е процес на постојано учење. Љубопитноста на човекот полека ги открива тајните на вселената и најмрачните делови на океанот, но човековата психа сè уште претставува мистерија. Себеспознавањето и љубовта кон себе се едни од најтешките задачи. Тоа е така бидејќи емотивната интелигенција не може да се научи од ниедна книга. Интернет сензацијата која што периодов е нешто за кое сите зборуваат, е видео на една осумнаесетгодишна девојка. Сè започнало како независен проект на Ши Гловер – Shea Glover во едно средно училиште во Чикаго, а денес е видео кое што досега има над четири милиони прегледи на интернет.
За што станува збор?
Гловер замолува неколку луѓе да застанат пред камера и им кажува дека се убави. Резултатот од оваа навидум едноставна реченица, има неверојатен ефект врз нивните реакции. Некои срамежливи, некои среќни, но сите лица после овој комплимент блеснуваат од среќа.
Целта не била да се добие реакција од луѓето, туку едноставно да се забележи убавината. „Сакам да фотографирам нешта што се убави“, вели таа, но производот што се добил од нејзиниот проект за убавината, прераснува во еден социјален експеримент кој покажува една длабока човечка димензија.
Убавината ја бараме и ја препознаваме насекаде околу нас, па неминовно се наметнува прашањето зошто е толку тешко таа убавина да ја најдеме во себе?
Запомнете дека најдолгата и најдлабоката љубовна врска е онаа со себеси. Љубовта и убавината започнуваат од нас па понатаму се рефлектираат на нашиот светоглед а со тоа и на сè што нè опкружува. Светот е убав, а убавината доаѓа од внатре.
Во прилог погледнете го ова видео исполнето со убавина:
