Дознајте како да ја препознаете и како да ја лекувате габичната инфекција на ноктите
Габичната инфекција на ноктите е предизвикана од габи (dermatophite) кои ја напаѓаат ноктената плоча, лежиштето и коренот на ноктот. Габичната инфекција придонесува за задебелување на ноктите, деформирање, кршење и промена на бојата и сјајот, која на почетокот претставува само козметички проблем. Вообичаено, инфекција на ноктот е безболна, но задебелениот нокт предизвикува болка и притисок, посебно, при носење на чевли (пешачење, вежбање, стоење). Овие инфекции претставуваат доста честа појава, која обично започнува од внатрешната страна на ноктот, па постепено се шири и може целосно да го уништи ноктот. Почесто ги зафаќа ноктите на стапалата, а поретко ноктите на дланките. Често се зафатени неколку нокти, а многу ретко сите одеднаш.
Како да ја препознаеме?
Првично, инфекцијата започнува во вид на бела или жолта дамка под врвот на ноктот. Тој го губи својот природен сјај. Потоа, како што продира подлабоко инфекцијата, ноктот ја променува бојата, станува кршлив и трошлив на краевите. На крај се деформира и задебелува. Може да бидат зафатани повеќе нокти, но не секогаш сите. Инфекцијата може да доведе до одвојување на ноктот од подлогата, проследено со болка.
Ризици
- Топла и влажна средина (на пример: работа поради која рацете се често водени, носење затворени обувки и сл.);
- Возраст (со зголемување на возраста се намалува протокот на крв и се забавува растот на ноктите);
- Често препотување;
- Носење чорапи и чевли кои попречуваат вентилација на стапалото;
- Често користење на базени, сали за вежбање и туш кабини;
- Фамилијарна предиспозиција;
- Дијабет, проблеми со циркулација или слаб имун систем;
- Атлетско стапало.
Дијагноза
Иако габичната инфекција на ноктот се препознава по изглед, многу други состојби и инфекции може да наликуваат на неа. Затоа, пред да се започне со третманот во вид на локална и орална терапија, габичната инфекција треба да се потврди од страна на дерматовенеролог со преглед и тестови. Дијагнозата најчесто се поставува според изгледот на ноктите и лабараториски се докажува (се земаат остатоци од зафатениот нокт, се засадуваат и се следи нивниот раст). Микроскопски се прави идентификација на причинителот.
Лекување
Студиите покажале дека најефективни се оралните антимикотици како: terbinafine и itraconazole. Овие лекови овозможуваат искоренување на габичната инфекција, притоа помагајќи го растот на новиот нокт. Лекувањето е поуспешно ако истовремено се користи и локална терапија. Поради несаканите ефекти кои ги имаат оралните антимикотици, најчесто се применува локална терапија. Доколку правилно и доволно долго се користат топикални препарати, успешноста на терапијата е многу честа. Терапијата трае минимум 6 -12 недели, а кај некои пациенти и повеќе од 4 месеци (или до потполно израснување на здрав нокт).
Како може да се спречи?
- Редовно миење на дланките и стапалата;
- Ноктите да се чуваат кратки и суви;
- Да се носат чорапи кои апсорбираат влага и често да се менуваат;
- Да се носат обувки со правилна вентилација;
- Да се носат чорапи и обувки од природни материјали;
- Да се носат ракавици при работа со вода и детергенти;
- Да не се гази бос на јавни места, околу базени, тушеви и соблекувални;
- Да се избегнува педикир и маникир, а доколку се прави, да се работи со стерилни инструменти;
- Да се мијат рацете по контакт со инфицирано лице, бидејќи габичната инфекција се пренесува при допир.
Д-р Дијана Ѓоргиевска, специјалист дерматовенеролог
