Гингивитисот е бактериска инфекција која предизвикува воспаление и крварење на вашите гингиви, која доколку не се третира води до пародонтопатија и на крај до губиток на забите. Затоа е потребно посебно внимание кога станува збор за хигиената на целиот потпорен апарат на забот, а не само на забите. Прочитајте како да ги препознаете знаците на заболување на гингивите и како да го спречите ширењето на ова заболување.
Гингивитисот е воспаление на гингивите предизвикано од бактериите во наслагите околу забите. Денталните наслаги се мек, леплив биофилм, кој доколку го погледнеме микроскопски претставува симбиотска организација на бактерии, прицврстени за површината на забот со полисахариден матрикс кој им овозможува да се исхрануваат, да секретираат киселини, да се размножуваат и да опстојуваат во усната празнина. Овој биофилм може да се отстрани само механички со четкање, а не со плакнење, поради ова акцентот за превенција на сите инфективни заболувања на забите и гингивите се става на редовно и темелно четкање на забите и употребата на интердентални конци и четкички.
Според Американската стоматолошка асоцијација, речиси половина од луѓето над 30 години во САД (поточно 47,1 %) имаат некоја форма на заболување на пародонтот. Па така доколку не се лекува, гингивитисот може да прогредира (развие) во пародонтопатија. Оваа потешка форма на заболување на пародонтот може да предизвика расклатување и испаѓање на забите. За да се спречат вакви несакани последици потребно е да се третира гингивитисот во рана фаза.
Како да ги препознаете знаците на гингивитис?
Здравите гингиви имаат бледо розева боја, обликот на интерденталната папила е триаголен, а конзистенцијата е цврста и ригидна. Се што отстапува од овој опис е можен знак за патолошки процес во гингивите.
- Најчесто први знаци на гингивитисот се крварење при четкање на забите или употребата на дентален конец. Ова крварење е провоцирано од четкањето и претставува индикатор дека постои воспаление на кое треба да му се обрне поголемо внимание со темелна хигиена.
- Исто може да забележите дека гингивите се зацрвенети, отечени и зголемени, а особено интерденталната папила која станува топчеста, додека работ на непцето се задебелува. Површината на непцето станува мазна и сјајна поради воспалението.
- Може да почувствувате трпнење и чешање, напнатост и чувство на туѓо тело меѓу забите, поради отокот на папилата.
- Лош здив
Причини и фактори на ризик за гингивитис
Лоша орална хигиена-наслагите се главниот виновник за појавата на гингивитисот и поради тоа потребно е темелно четкање најмалку двапати дневно, чистење на интерденталните простори со конци, четки и орални флосери и отстранување на бактериите од јазикот.
Доколку плакот остане доволно време на површината на забите се стврднува, поради минерализација со неоргански материи од плунката, најчесто калциум и фосфати и настанува забен камен. Забниот камен понатаму ја иритира гингивата и претставува место каде што се задржува плакот и дополнително придонесува за нејзино воспаление. Забниот камен може да го отстрани само стоматологот со посебни, ултразвучни инструменти.
Постојат и други ризик фактори за кои треба да бидете свесни. Пушењето е значаен фактор на ризик за заболување на пародонтот. Всушност, според Journal of Dental Research, пушачите имаат двојно поголема веројатност од непушачите да имаат заболување на гингивите.
Прогресија на гингивитисот во пародонтопатија
Нетретираниот гингивитис може да премине во пародонтопатија. Доколку наслагите не се отстрануваат подолго време, бактериите се шират под линијата на непцето. Токсините произведени од бактериите во наслагите ги иритираат меките ткива на пародонтот и стимулираат хроничен воспалителен одговор, а ткивата и коската што ги прицврстуваат забите се уништуваат и се формираат пародонтални џебови. Како што болеста напредува, џебовите се продлабочуваат поради поголемо уништување на ткиво и коска.
