Честа грешка којашто родителите ја прават е купување или вдомување на домашно милениче без целосно разбирање на нивото на ангажираност
Миленичињата се одлични за физичкото и психичко здравје на човекот. Грижата за миленичиња може да ја зголеми самопочитта, да ја спречи осаменоста, па дури и да го намали срцевиот ритам и крвниот притисок кај некои луѓе.
Растењето со милениче може да биде од голема корист за децата. Но запомнете дека иако растењето и грижењето за домашно милениче ќе им даде чувство на одговорност на децата, само возрасните можат да бидат вистински одговорни за истото. Оттука, изборот на вистинското милениче е сериозна одлука што возрасните членови од семејството треба да ја направат заедно.
Честа грешка којашто родителите ја прават е купување или вдомување на домашно милениче без целосно разбирање на нивото на ангажираност. На пример, многу родители земаат миленичиња, вообичаено куче или маче, како подарок за Божиќ, Нова година или роденден за своите деца, без да размислат колкава всушност е одговорноста која е потребна за добра грижа на истите.
Прашања што треба да си ги поставите пред да купите или посвоите милениче
Пред да посвоите или купите било какво домашно милениче, потребно е да се разговара со сите членови на семејството за очекувањата и одговорностите околу грижата за истото и да се размисли на начинот на живот на вашето семејство. Исто така, неопходно е да се разговара со децата со цел да им се објасни дека ќе треба да помагаат во грижата за овие животни коишто бараат сериозен ангажман. Како да одберете милениче за вашите деца? Во кругот на семејството се препорачува да се постават следниве прашања пред да се купи или посвои едно милениче:
- Колкава грижа ќе биде потребна за миленичето?
- Како моето дете реагира во близина на миленичиња?
- Каква улога ќе игра секој член на семејството во грижата на миленичето?
- Кој ќе го храни, бања, шета и чисти неговото катче во домот?
- Каков вид на медицинска нега ќе биде потребна на миленичето?
- Колку големо ќе порасне и дали имаме услови да го чуваме?
- Дали ќе го земеме со нас на патување или кој ќе се грижи за миленичето кога ќе заминеме без него?
- Дали некој од семејството има алергии или астма?
Откако ќе одлучите да посвоите или купите милениче
Откако ќе одговорите на горенаведените прашања и заклучите дека сте подготвени да вклучите домашно милениче како уште еден член во семејството, следува делот во кој треба да се подготвите за неговото доаѓање во домот.
Пред да изберете било каков вид на животно за вашето семејство, научете колку што можете повеќе за неговата раса. Следниве неколку совети може да ви помогнат во тој процес:
- Прочитајте повеќе за специфичните раси на миленичиња пред да одлучите какво би ви одговарало на семејниот стил на живот и условите во домот. На пример, важно е дали имате услови да чувате милениче со мал или голем раст;
- Истражете повеќе за различните раси на миленичиња и како сите тие реагираат на деца или други миленичиња. На пример, некои раси на кучиња се сметаат за помалку толерантни во однос на деца. Златните ретривери и лабрадорите, пак, имаат одлична репутација како кучиња кои се пријателски настроени за семејството;
- Консултирајте се со ветеринарно лице во врска со медицинската грижа којашто ќе треба да му се даде на животното;
- Одлучете дали сакате да купите милениче од продавница за миленичиња, од приватен сопственик или да посвоите од здружение за грижа на миленици;
- Разговарајте со соседите и пријателите за нивните искуства во чувањето на различни видови домашни миленици.
