Неколку трикови како да не се прејадувате
Бебињата знаат кога да јадат и кога им е доста. Проблемот настанува понатаму во животот, кога ја губиме оваа способност, која е најважна за правилна исхрана. Многу често, храната се перцепира како награда (по завршување на успешна диета или тешка вежба) или навика (начин на јадење кој останал од детството). Исто така, се прејадуваме заради лошо планирање на времето, односно за појадок немаме време, кога треба да ручаме работиме, па така, за време на вечерата многу се големи шансите да се прејадеме. Се смета дека се потребни 20 минути за да се најадеме и сè понатаму е веќе прејадување. Исто така, умереноста во јадењето и пиењето се сметаат како најважни навики за здрав живот и долговечност. Во продолжение, ви предлагаме неколку совети како да не се прејадувате.
Редовно појадувајте
Ако појадувате обилно, тогаш мали се шансите да се прејадете во текот на денот. Житарици, јогурт, сезонско овошје, не е важно што од ова ќе изберете, важно е да не бидете гладни. Постојат многу истражувања кои докажуваат дека појадокот е најважниот оброк и дека само 4 проценти од луѓето кои што не појадуваат, успеваат да ја задржат телесната тежина на нормално ниво.
Супа пред оброк
За среќа, оваа навика е традиционално застапена во македонските домови. Чинија топла супа му дава првичен сигнал на мозокот дека веќе има храна. Исто така, наместо крем супи, јадете бистри зеленчукови, а најдобро е сами да ги приготвите.
Не јадете додека гледате во екран
Погрижете се додека јадете, вниманието да не ви го одземаат содржините од компјутерскиот или телевизискиот екран. Вниманието насочете го кон храната и на тој начин ќе контролирате колку сте изеле, ќе јадете побавно и ќе спречите прејадување.
Контролирајте го стресот
Напорни работни обврски, нерешени односи и тензии, недостаток на сон, презафатеност, сите овие водат кон хроничен стрес, а тој води кон прејадување.
Јадете во помали чинии
Доколку започнете да внимавате и планирано да ја сервирате храната во помали чинии, дневниот внес на калории ќе го намалите за 12 до 16 проценти, односно, ќе внесувате околу 280 калории помалку секој ден, истакнува едно ново истражување.
Редовно вежбајте
Доколку сте постојано физички активни, мали се шансите да се прејадувате. Доколку не сте љубители на вежбањето, и триесет минутно пешачење во текот на денот, може да ви помогне да го контролирате гладот и прејадувањето.
Внесувајте повеќе растителни влакна
Храната богата со растителни влакна ќе ве држи сити подолго време, без да почувствувате ненадеен пад на енергијата. Добро е секогаш блиску до вас да имате здрави грицки за да го заситите гладот привремено. Здрава храна која што ќе ве засити е храна богата со протеини а сиромашна со шеќери.
