istrazhuvanje-zagadeniot-vozduh-go-zgolemuva-rizikot-od-zaboluvanje-od-dijabetes_image
Споделете со пријателите!

Истражувачите процениле дека загадувањето на воздухот придонело за 3,2 милиони нови случаи на дијабетес на глобално ниво во 2016 година.
Според нова студија спроведена на Медицинскиот факултет во Вашингтон се смета дека постои поврзаност помеѓу надворешното загадување на воздухот и зголемен ризик од заболување од дијабетес. Наодите од истражувањето се однесуваат дури и на нивоата на загаденост коишто се сметаат за безбедни.

Добиените податоци всушност сугерираат дека намалувањето на загадувањето може да придонесе за намалување на бројот на нови случаи на заболување од дијабетес во многу загадени земји, како што е Индија, но и помалку загадени земји, како што е САД.

Дијабетесот е една од најбрзо растечките болести кои зафаќаат повеќе од 420 милиони луѓе ширум светот. Главните двигатели на дијабетесот се нездравата исхрана, седечкиот начин на живот и прекумерната тежина, но новото истражување конкретно укажува на степенот до кој загадувањето на воздухот може да влијае за појавување на болеста.

istrazhuvanje-zagadeniot-vozduh-go-zgolemuva-rizikot-od-zaboluvanje-od-dijabetes_image1„Во текот на изминатите две децении, имаше истражувања за дијабетесот и загадувањето. Сакавме да ги соединиме добиените податоци за да добиеме поширока и солидна слика. Нашите истражувања покажуваат значајна врска помеѓу загадувањето на воздухот и дијабетесот на глобално ниво. Забележавме зголемен ризик, дури и при ниски нивоа на загадување на воздухот што во моментов се сметаат за безбедни од страна на Агенцијата за заштита на животната средина на САД и Светската здравствена организација. Ова е важно затоа што многумина тврдат дека сегашните гранични вредности на загаденост се премногу строги. Но наодите од истражувањето покажуваат дека сегашните граници сè уште не се доволно безбедни и треба да бидат уште построги“, истакна д-р Зијад Ал-Али, автор на студијата и професор по медицина на Универзитетот во Вашингтон.

За да се оцени загадувањето на надворешниот воздух, истражувачите разгледувале честички, микроскопски делови од прашина, нечистотија, чад и течни капки во воздухот. Претходните студии покажале дека таквите честички можат да влезат во белите дробови и крвотокот што може да предизвика сериозни здравствени состојби, како што се срцеви заболувања, мозочен удар, рак и болести на бубрезите. Кај дијабетесот се смета дека загадувањето го намалува производството на инсулин и предизвикува воспаление, спречувајќи го телото да ја претвора гликозата во крвта во енергија што треба да го одржува здравјето на телото.

Истражувачите процениле дека загадувањето придонело за 3,2 милиони нови случаи на дијабетес на глобално ниво во 2016 година, што претставувало околу 14 отсто од сите нови случаи на дијабетес на глобално ниво истата година. Тие, исто така, процениле дека во 2016 година се изгубени 8,2 милиони години здрав живот поради дијабетесот поврзан со загадувањето на воздухот што претставува околу 14 отсто од сите години на здрав живот изгубени поради дијабетес од било која причина.

Тимот на Вашингтонскиот универзитет, во соработка со научниците од Центарот за клиничка епидемиологија на ветераните, го разгледал односот помеѓу ПМ-10 честичките и ризикот од дијабетес со анализирање на податоците од 1,7 милиони американски ветерани, кои во просек биле следени во текот на 8,5 години. Потоа тие ги анализирале сите истражувања поврзани со дијабетесот и надворешното загадување на воздухот и измислиле модел за проценка на ризикот од дијабетес во однос на различни нивоа на загадување. Податоците помогнале да се проценат годишни случаи на дијабетес и здрави години на живот изгубени поради загадувањето.

Прочитајте:  „Алкалоид“ пушти во употреба нови производни капацитети – инвестиција вредна над 2,5 милиони евра

Истражувачите, исто така, утврдиле дека севкупниот ризик од дијабетес поврзан со загадувањето е поверојатен во земјите со понизок приход како што е Индија, кои немаат соодветни системи за заштита на животната средина и политики за чист воздух. На пример, посиромашните земји кои се соочуваат со повисок ризик од заболување од дијабетес предизвикан од загадување на воздухот се Авганистан, Папуа Нова Гвинеја и Гвајана. Додека во САД постои умерен ризик за појава на случаи на дијабетес заради загадување на воздухот, кај побогатите земји како Франција, Финска и Исланд ризикот е помал.


Споделете со пријателите!