За одржување на кондицијата и доброто здравје, препорачувам 3 до 4 пати неделно тренинг кој би се состоел од кардио вежби и вежби за обликување на телото
Борче Лазарев е млад тренер со многугодишно искуство. Со него разговаравме за предизвиците во неговата професија, тренирање на професионални спортисти но и рекреативци. Исто така, тој ни даде и по некој професионален совет за важноста на исхраната и како да го одржиме доброто здравје.
Ти си добро познат како кондиционен тренер. Колку години работиш како тренер и за кои тимови си работел досега?
Имам 13 годишно искуство како кондиционен тренер. Сум работел за многу познати тимови, во прв ред: ФК Работнички, ФК Тетекс, ФК Рудар (БиХ), РК Металург. Тоа се долги години искуство исполнето со незаборавни моменти, дружење, победи.
Работиш со познати спортисти. Дали би можел да ни кажеш некоја интересна случка којашто се случила за време на твој тренинг?
Да, сум работел со познати спортисти како Филип Деспотовски, Христијан Кировски, Виктор Ангелов, Ѓоко Зајков, Фоусс Бамба, Јове Костовски и други. Има една ситуација, еднаш им предложив, кој ќе се качи на пилатес топка со двете нозе и ќе се задржи ќе добие бесплатен тренинг цел месец. Еден од спортистите се качи на топката и во истиот момент „летна“ од неа, изгледаше како да нагазнал на мина. Сите се смеевме.
Како се одвива еден твој тренинг за подготовки за професионални спортисти?
За професионалните спортисти има посебна програма, во зависност од потребите кои ги налага нивниот спорт. Најпрво се загреваме. Имаме динамичко и специфично загревање. После тоа, имаме главен дел во кој што се опфаќаат специфични движења и вежби. Завршниот дел се состои од рекуперирање на мускулатурата.
Освен спортисти, кои други се одлучуваат за индивидуални тренинзи? Дали се тоа луѓе коишто немаат време сами да се организираат или оние што не можат да се мотивираат?
За индивидуален тренинг се одлучуваат сите кои сакаат да постигнат добар изглед на своето тело и сакаат да ги подобрат своите перформанси. Најчесто, тоа се луѓе кои се вработени и сакаат да одвојат дел од секојдневието посветен на себе и на своето здравје.
За што најмногу се обраќаат кај тебе, за подобрување на здравјето или пак брзо слабеење. Што најчесто сакаат да постигнат? Воедно, на која возраст се?
Најмногу се обраќаат за подобрување на нивната силуета, воедно и самите се свесни дека го подобруваат и здравјето. Може да се каже дека кај мене најмногу се обраќаат повозрасни луѓе кои што се во работен однос, па немаат многу слободно време на располагање за сами да се организираат да вежбаат, но тоа не значи дека нема исклучоци. Кај мене може да се обрати секој кој сериозно сака да се посвети на себе, со помош на професионална индивидуализирана фитнес програма под мој надзор.
Кои фитнес програми ги нудиш и каков тип на вежби се тие?
Во зависност од барањата на рекреативците, се нуди комбинирање на вежби од пилатес, јога, кросфит и специфични вежби за подобрување на перформансите. Сè зависи од тоа што сакаат да постигнат, односно која е нивната замислена крајна цел.
Што да се прави при воспаление на мускули?
Воспалението на мускули е честа појава особено кога некој започнува со вежбање и нималку не е пријатно. При воспаление на мускули препорачувам да се земаат антиоксиданси, масажи, релаксирање во спа-центри.
Колку е важна исхраната? Дали сметаш дека мускулите започнуваат да се градат во кујна?
Исхраната е еден од најважните фактори за подобрување на мускулната маса. Може да се каже дека 50 % зависи од неа, а останатите 50 % се во тренингот и рекуперација на мускулатурата. Едно без друго не оди. За вистински резултати потребна е грижа и внимание врз сите аспекти на секојдневните навики.
Што мислиш за суплементите за подобрување на перформанси?
Суплементите како додаток се неопходни за професионалните спортисти за подобрување на нивниот перформанс. Додека, кај рекреативците може, но и не мора да се земаат. Според досегашното мое искуство, советувам да се зема квалитетна и здрава храна искомбинирана со јагленохидрати, масти и протеини.
Што да се вежба доколку сакаме да ја одржиме кондицијата и доброто здравје? Колку често и со каков режим на исхрана?
За одржување на кондицијата и доброто здравје, препорачувам 3 до 4 пати неделно тренинг кој би се состоел од кардио вежби и вежби за обликување на телото. Исто така е важна балансирана исхрана која се состои од 3 основни оброци и 3 ужини на секои два и пол до три часа. Да не ја заборавиме и водата која се конзумира 1,5 до 2 литри во денот, во зависност од телесната тежина.
