Овие мали уреди може да бидат соодветна замена за постоечката медицинска опрема
Неодамна на Форумот за медицина „International Electron Devices Meeting“ во Сан Франциско, САД, беше претставена медицинската иновација – сензор од графен што се става на кожата како привремена тетоважа. Станува збор за сензори што се можеби најмалите епидермални електронски уреди што со електронски сигнали ги мерат ритамот на срцето, мускулите и мозокот, како и телесната температура и хидратација на телото.
Денес, доколку вашиот лекар сака да го следи вашиот срцев ритам во текот на подолг временски период со цел да може да дијагностицира постоечка кардиоваскуларна нерегуларност, би ви поставил ЕКГ уред на телото што ќе го носите околу 24 часа.
Научниците од Универзитетот на Тексас во Остин, се надеваат дека ќе направат систем што би ги дал истите или уште подобри резултати. Тие ги развиваат сензорите надевајќи се дека овие мали уреди ќе бидат соодветна замена за постоечката медицинска опрема. Тие креацијата на сензорите од графен ја започнале со ставање еден слој графен на бакарен лист. Потоа 2Д јаглеродниот лист го обложиле со еластичен полимер, а бакарниот лист бил отстранет. Следниот чекор бил полимерниот лист од графен да го стават на хартија за привремено тетовирање, по што го врежале графенот со цел да се направат електроди поврзани меѓусебно со еластична спирала и на крајот го отстраниле вишокот графен. Потоа сензорот бил подготвен да се примени со ставање на кожата и влажнење на задниот дел на хартијата.
Истражувачите користеле тетоважи од графен за да се спроведат пет видови на мерења коишто подоцна ги споредиле со резултатите од конвенционалните сензори.
Електродите од графен можат да ги регистрираат промените во електричниот отпор предизвикани од електричната активност во кожното ткиво. Меѓудругото, кога бил поставен на гради, сензорот од графен открил слаби флуктуации кои воопшто не биле видливи на ЕКГ- уредите. Графенот се приспособува на кожата и токму тоа може да биде тоа би овозможило да се спроведат мерења на ритамот на срцето, мозокот и сл., со висок квалитет. Воздушните празнини помеѓу кожата и релативно големите и цврсти електроди содржани во конвенционалните медицински уреди всушност го намалуваат квалитетот на сигналот на истите.
Поновите медицински сензори вообичаено цврсто се поставени на кожата и имаат помали воздушни празнини, но бидејќи се потенки за неколку микрометри и користат електроди од злато што се дебели стотици нанометри, тие можат да го изгубат контактот со кожата кога ќе се појават брчки. Графенот во сензорот на истражувачите од Тексас е со дебелина од 0.3-nm.
