Нов хируршки зафат може да го подобри видот на пациентите што страдаат од макуларна дегенерација на окото
Новиот хируршки зафат за имплантација на минијатурниот телескоп во окото на пациент кој боледувал од макуларна дегенерација во напредна фаза за првпат беше изведен од страна на др. Грег Огава, очен хирург во болницата „Eye Associates of New Mexico“ во Њу Мексико, САД. Имплантацијата на минијатурниот телескоп е новитет во очната медицина и претставува дел од „CentraSight“ – нова програма за третирање на макуларна дегенерација на окото, состојба којашто го зафаќа централниот дел од мрежницата и предизвикува губење на видот во централниот дел во окото.
Пациентите кај коишто е развиена дегенеративна состојба на макулата, можат да гледаат само од периферните агли на окото.
Во крајна фаза, оваа состојба не може да се излечи со носење на леќи, ниту пак со медикаменти или оперативни зафати, оттука истата е причина за често губење на видот кај возрасните над 65 години.
Минијатурниот телескоп со големина на зрно грашок којшто е речиси незабележителен, со операцијата се вградува во централниот дел зад рожницата на окото. Кај пациентите со макуларна дегенерација телескопот има функција да ги зголемува и пренесува сликите што пациентот ги гледа од централниот во здравиот дел на мрежницата во неговото око. По операцијата за имплантација на телескопот предвиден е период од еден до шест месеци во кои окото заздравува, по што следува периодот од три месеци во кој пациентот со помош на тим очни специјалисти учи како да го користи телескопот.
„Во текот од три месеци по заздравувањето на окото пациентот треба го тренира својот мозок да го користи телескопот за централно гледање, додека другото око за широко гледање. Пациентите коишто може да бидат потенцијалните кандидати за имплантација на телескопот задолжително треба да поминат низ одредени тестови за проверка на способностите за користење на овој уред“, потенцира д-р Огава.
