Доилки, претпазливо со лековите!

Многу лекови се безопасни за доенчињата, без разлика на количината на нивната концентрација во млекото, додека други можат да бидат потенцијално штетни и во минимални количини

Сè што доилката внесува во својот организам, доаѓа во помала или поголема мера во млекото. Тоа посебно се однесува на лековите. Доењето е најубав чин на блискост помеѓу две суштества, при што од мајката во детето не се пренесува само млеко, туку и сета љубов на овој свет. Мајчиното млеко по својот состав e идеална храна за бебето, и не може да му штети – ако мајката е здрава. Но што ако се разболите додека го доите бебето, или претходно сте биле болни?

Дали лековите што ги користите се штетни за вашето дете

Некои лекови се излачуваат во млекото во безначајно мала количина, но во одредени случаи концентрација на лекот кој го користите е поголема во млекото отколку во вашата крв! Кај некои лекови, излачувањето во млекото не е познато, па во периодот на доење треба да се користат мошне внимателно.

Многу лекови се безопасни за доенчињата, без разлика на количината на нивната концентрација во млекото, додека други можат да бидат потенцијално штетни дури и во минимални количини, без разлика дали се во прашање несаканите дејства, кои исто така ги погодуваат и возрасните, или пак, затоа што нивото дејство е поинакво врз бебето. Некои лекови можат да предизвикаат голема чувствителност (алергија), што може да биде опасно ако се земаат повторени дози.

Антибиотиците (освен оние за надворешна употреба), по правило ја нарушуваат нормалната цревна флора (ги убиваат и корисните цревни бактерии), па можат да предизвикаат грчеви, дури и пролив кај бебето.

Но, тоа најчесто не спаѓа во посериозни несакани ефекти. Сознанијата за дејството на многу лекови врз доенчето се сè уште недоволни, бидејќи во практиката мошне мал број доилки земаат лекови. Од друга страна, постојат дополнителни препреки околу мерењето на содржината на лековите во млекото.

Ако лекот е опасен за бебето, а не постои соодветна замена, ќе треба привремено да го стопирате доењето и да го фрлате млекото. Доколку ви е препишан лек кој е штетен за бебето, дали треба да се прекине доењето? Во овој случај, според советите на педијатрите, бебето треба да го храните со адаптирана формула. Доколку не треба итно да се лекувате, тие советуваат пред да ја започнете терапијата, да соберете колку што можете повеќе од своето млеко и да го замрзнете во претходно зовриени пластични шишиња, така што за време на терапијата би можеле со него да го храните бебето.

Пред употреба, млекото не се проварува, за да не се уништат вредните состојки, туку полека се раствора.

Тоа се прави така што шишето со смрзнато млеко се потопува во сад со топла вода, а по растворањето се загрева до температурата на телото (37 степени), со повремено протресување. Вашето млеко може во стерилни шишиња да стои во замрзнувачот до три месеци. Еднаш одмрзнато, не смее повторно да се замрзнува, туку може да се држи во ладилникот уште 48 часа. Млекото што не може да се употреби, мора да се фрли.

Дали веднаш по завршувањето на терапијата во текот на која не сте смееле да доите можете да продолжите со доењето?

Потребно е од вашиот организам да се излачат и последните траги од одредениот лек. Времето од последната доза на лекот до почетокот на доењето, зависи од метаболизмот на засегната супстанца во вашиот организам, што значи дека не е исто за секој лек или за секое дијагностичко средство. Не смеете да почнете со доење додека лекарот не ви дозволи!

Дали смеам да примам вакцини додека го дојам бебето?

Смеете, без ограничувања, велат лекарите.

Дали смеам да нанесувам средства против комарци на кожата додека дојам?

Средствата против комарци се делат на инсектициди и репеленти. Инсектицидите ги убиваат инсектите и не се нанесуваат на кожата, додека репелентите само ги бркаат, а се користат во облик на течности, кремови, спрејови и стик за кожа. Обично содржат миризливи масла на цитронела, лаванда или еукалиптус. Делуваат така што шират мириси кои ги одбиваат комарците и мувите, а притоа се потполно безопасни, па можете да ги користите додека го доите бебето.

За бебето да биде заштитено, најдобро е (барем додека сте дома) да залепите покрај неговото креветче фластер, или да вклучите апарат во струја со некој миризлив репелент, или оној врз база на ултразвучни бранови, кои што ги бркаат инсектите. Пред употребата задолжително прочитајте го упатството, во кое мора да пишува дали во составот на таблетите има инсектицид или репелент. Во присуство на децата користете само репелент. Притоа водете сметка децата да немаат пристап до тоа средство, за да не го стават во уста. Алтернативна опција е на прозорците да ставите мрежа, за да не ви влегуваат инсекти во домот.

Што смеам да земам против зголемена температура додека дојам?

Доилките не треба самоиницијативно да земаат на подолго време никакви лекови. Ако ви е потребен лек против болки или против покачена температура во првите месеци од породувањето, во домашни услови замете само парацетамол, а после тој период и ибупрофен. Лековите во чии што состав влегува ацетилсалицилна киселина (аспирин, андол, амбол, мидол и многу други), смеете да ги користите само во помали количини. Доколку сте алергични на парацетамол посоветувајте се со својот лекар. Секогаш пред употребата на некој лек прочитајте го внимателно упатството!

Дали смеам да користам средства за сончање и самопотемнување додека дојам?

Смеете слободно да ги користите, само пред доењето измијте ги темелно брадавиците и пределот околу нив, доколку биле намачкани.