DigniCap е силиконска капа којa им помага на пациентите кои примаат хемотерапија да ја задржат косата
DigniCap е силиконска капа којa им помага на пациентите кои примаат хемотерапија да ја задржат косата. Оваа капа се контролира компјутерски и го намалува крвотокот до влакната на главата за што помалку хемикалии кои се борат против канцерогените клетки да допрат до клетките на косата. Бидејќи се забавува метаболизмот на клетките тие примаат помала доза од терапијата. Тоа им помага на голем дел од пациентите да не ја изгубат косата, а со тоа и уште побитното чувство на самодоверба.
Капата е дело на шведската компанија Dignitana AB веќе неколку години се користи во некои европски земји, а пред неколку дена беше одобрена и од Управата за храна и лекови на САД за употреба кај пациентите со рак на дојка.
Еден од докторите кои ги спроведувале анализите на капата и ја проверувале нејзината ефикасност вели дека губењето на косата е трауматско искуство за пациентите и за тие кои го победиле ракот.
„За многу пациенти губењето на косата е прашање на суета. Тоа е постојан потсетник дека се болни кој негативно се одразува на самодовербата и на општото здравје“, пишува на официјалната интернет-страница на компанијата Dignitana AB.
Опаѓањето на косата придонесува жените да се чувствуваат како обележани, како нешто да не е во ред со нив и сите ги гледаат чудно, затоа што, генерално, луѓето се плашат од болести и болни луѓе. Хемотерапијата трае неколку месеци, а потребно е да помине повеќе од една година додека да порасне новата коса.
Разладувањето на скалпот за спречување на опаѓањето се применува веќе неколку децении. Екстремно ниските температури треба да ги спречат лекарствата да допрат до косата, но DigniCap е првата верзија на ваква капа коjа е одобрена од Управата за храна и лекови на САД. Компанијата Dignitana AB ќе ги изнајмува капите на центрите за лекување канцер.
Капата функционира така што половина час пред да почне хемотерапијата капата се става на главата и се поврзува со машина за разладување. Постепено го разладува скалпот додека не отрпне. По завршувањето на хемотерапијата капата се носи уште час и половина додека не се намали нивото на медикаменти во крвта.
Докторите кои ја тестирале капата во САД во тестирањето вклучиле 122 жени кои примале стандардна хемотерапија за рак на дојка во ран стадиум и повеќе од две третини од жените задржале повеќе од половина од својата коса.
Најчестите нуспојави од капата се главоболка поради ниските температури, непријатно чувство во вратот и во рамената, настинка и болка поради носење на капата подолг период, велат од Управата за храна и лекови.
Иако некои доктори се сомневаат дека можеби ниските температури спречуваат хемотерапијата да допре до канцерогените клетки во скалпот, од Управата велат дека веројатноста да се случи тоа е многу мала. Сè уште не е прецизирана цената, но пациентите ќе треба да плаќаат за секој третман со капата. Во зависност од тоа колку пати треба да примаат хемотерапија, вкупниот трошок ќе се движи од 1.500 до 3.000 долари.
Превземено од: Иновативност.мк
