Од вкупниот број испитаници, 46,8 отсто изјавиле дека пиеле засладени безалкохолни газирани пијалоци, а 31,2 отсто дека пиеле диетални безалкохолни газирани пијалоци.0
„Диеталните газирани пијалаци кај луѓето со дијабетес може да го зголемат ризикот за заболување од дијабетична болест на очите, дијабетична ретинопатија, што може да доведе до слепило“, се вели во една нова студија.
Студијата, објавена во дневникот „Clinical and Experimental Ophthalmology“, е првата којашто ја истражува врската помеѓу диеталните газирани пијалаци и состојбата што се нарекува дијабетична ретинопатија.
„Во нашата студија, консумирање повеќе од четири лименки или 1,5 литри на диетални газирани пијалаци неделно, кај луѓето со дијабетес, беше поврзано со двојно зголемен ризик од пролиферативна дијабетична ретинопатија“, изјави д-р Ева Фенвик, клинички истражувач во Сингапурскиот Институт за истражување на очи и доцент во Медицинскиот факултет во Сингапур.
„Студијата не ги покажа истите резултати кај оние учесници во студијата коишто пиеле засладени безалкохолни пијалоци. Потребни се повеќе студии за да се утврди дали диеталните газирани пијалаци се нездрава алтернатива на засладените газирани пијалаци“, вели Фенвик.
Диеталните газирани безалкохолни пијалоци се продаваат како поздрави од обичните, односно засладени газирани безалкохолни пијалаци, но сè поголем број докази сугерираат дека вештачките засладувачи можат, исто така, да му наштетат на здравјето. Претходни истражувања ги поврзуваат диеталните газирани пијалаци со поголем ризик од дијабетес, срцеви заболувања и мозочен удар.
Студијата вклучила 609 возрасни лица, од кои 73 со дијабетес тип 1, 510 со дијабетес тип 2 тип и 26 со непознат тип на дијабет во очна болница помеѓу 2009 и 2010 година. Просечната возраст на учесниците била 64,6 години. Сите учествувале во прашалник составен од 145 прашања во кој изјавиле колку безалкохолни газирани пијалаци пиеле на неделно ниво. Од вкупниот број испитаници, 46,8 отсто изјавиле дека пиеле засладени безалкохолни газирани пијалоци, а 31,2 отсто дека пиеле диетални безалкохолни газирани пијалоци. Речиси една четвртина имале пролиферативна дијабетична ретинопатија.
Истражувачите откриле дека оние кои пиеле повеќе од четири чаши од по 350 мл диетални газирани пијалаци неделно имале 2,5 пати поголеми шанси да ја имаат оваа болест, додека оние што редовно пиеле засладени безалкохолни газирани пијалаци, не ја покажале истата веројатност. Тие ги прилагодиле резултатите за одредени фактори кои обично ја прават дијабетичната ретинопатија поверојатна, како што е времетраењето на дијабетесот, пушењето и индексот на телесна маса.
„Нашето откритие дека засладените безалкохолни газирани пијалаци не се поврзани со зголемен ризик од пролиферативна дијабетична ретинопатија, може да се должи на малиот број на лица коишто беа дефинирани како големи консуматори. Моравме да ги споиме категориите на големи и умерени консуматори на засладени газирани пијалаци што има можност да ја скрило вистинската врска“, изјави Фенвик за „Medscape Medical News“.
Истражувачите велат дека, иако резултатите од студијата мора да се толкуваат во контекст на неколку ограничувања, тие се надоврзуваат на доказите од повеќе досегашни истражувања и студии за штетните ефекти на диеталните газирани пијалаци врз нашето здравје, вклучувајќи кардиоваскуларна болест, дијабетес и метаболички синдром, рече Фенвик.
