Денталниот имплант е одлично решение бидејќи изгледа и функционира како природен заб
Денталните импланти претставуваат прв избор на терапија, компарирано со другите опции за реставрирање на забите кои недостасуваат заради следниве факти: Денталниот имплант е силна и стабилна замена на природните заби која изгледа, функционира и се перцепира како природен заб. Другите тераписки модалитети на реставрирање на изгубените природни заби имаат несакани ефекти како што е последователната коскена ресорпција и/или интерферирање со џвакалната и фонетската функција како и со низа на други животни активности.
Целта на современите имплантолошки системи е да траат доживотно („would last for lifetime“ – Smith and Zarb, 1989). Најдобрите десет имплантолошки системи се дизајнирани да траат доживотно. Кај традиционалните дентално носени протетички реставрации, со текот на времето, по 5 до 7 години (или со иделна грижа 10 години) се јавува потреба да бидат заменети со нова конструкција (проф. Carl Misch). Додека имплант-протетичките конструкции, кои периодично се одржуваат, имаат големи шанси за доживотна функција (под услов да се идеално испланирани, поставени и одржувани). Еден таков историски пример се Gösta Larsson и Sven Johansson пациенти кои меѓу првите биле третирани од страна на проф. Per-Ingvar Brånemark, татко на модерната имплантологија и концептот на осеоинтеграција, и кои се сведоци на 44 годишната имплантно-протетичка успешна приказна.
Долготрајноста на успешната терапија генерално зависи од три клучни фактори и тоа внимателно планирање, квалитет на избраниот имплантолошки систем и континуирано следење (follow up).
Денталните импланти се однесуваат како чувари на природната коска односно го превенираат нејзиното неизбежно физиолошко ресорбирање по губитокот на природниот заб. Денталните импланти не само што ја презервираат алвеоларната коска туку и го стимулираат нејзиното создавање.
Денталните импланти го одржуваат природниот изглед на контурите на вашето лице и насмевка.
Традиционалната фиксна мостова конструкција подразбира препарирање на соседните заби (агонисти), едноставно кажано нивно „жртвување“ заради надоместување на забите кои недостасуваат. Денталните импланти се инсерираат во коската најчесто на местото каде биле природните заби без да се нарушува интегритетот на соседните здрави заби.
Со помош на денталните импланти се елиминира потребата да се остане дома заради лична неудобност при јавни настапи или било каков социјален живот како резултат на загуба на природните заби или стравот дека мобилната протеза би „паднала“ при јадење или смеа. Со помош на денталните импланти, пациентите можат повторно да уживаат во целокупниот вкус на храната, може да загризуваат најприродно и да консумираат скоро сè што ќе посакаат. Без грижа и додатно оптеретување при одржување на протетичката реставрација. Грижата за имплантите со мали модификации е генерално иста како кај природните заби.
