Астмата е една од најчестите хронични болести во светот и се претпоставува дека околу 300 милиони луѓе во светот патат од ова заболување
Светскиот ден на астмата е годишен настан организиран од Глобалната иницијатива за астма – GINA, со цел да се покрене свеста за астмата и нејзина превенција ширум светот. Светскиот ден на астмата, годинава се одбележува под мотото: „Ти можеш да ја контролираш твојата астма“.
ЈЗУ Клиника за пулмологија и алергологија, Здружението на пулмолози на Република Македонија и Македонското здружение за алергологија и клиничка имунологија, се вклучуваат во одбележувањето на Светскиот ден на астмата со повеќе активности и предавања ширум земјава. Стручен состанок на тема „Стратегија за справување на астма во Македонија“ ќе се одржи денеска по повод Светскиот ден на астма, во организација на Македонското респираторно здружение.
Астмата може да биде предизвикана од еколошки и наследни фактори и основниот механизам кој доведува до симптоми на астма е сложената имунолошка реакција на респираторниот систем на алергени од непосредната околина, при што се развива воспалителна реакција. Најчести симптоми на напад на астма се: иритација на нос и грло, тешко и отежнато дишење, кашлање и болка во градите, додека најчести предизвикувачи и алергени се: загаден воздух, прашина, полен, мувла.
