Денес светот го одбележува Денот на планетата Земја
Овој ден за првпат е одбележан во САД, во 1970 година, кога се одржани најголемите еколошки демонстрации во историјата. Целта на одбележувањето на „Денот на планетата Земја“ е да се подигне нивото на свеста на луѓето за зачувување на животната средина.
Денес, лидерите од 160 земји официјално ќе го потпишат „Парискиот договор за климатски промени“ во Обединетите нации во Њујорк, САД, кој што треба да обезбеди поздрава и посигурна иднина. Овој договор, на денешното одбележување му дава еден посебен и многу важен историски тон.
Овогодишешната иницијатива на Ден на планетата Земја е одбележување на денот со садење или прегрнување на дрвја, со цел да се искаже љубовта и благодарноста кон природата. Одбраната тема на садење дрвја има повеќе аспекти: со тоа што апсорбираат CO2 тие помагаат во борбата со климатските промени, овозможуваат да се дише чист воздух и помагаат во развојот и одржувањето на заедниците.
На оваа иницијатива, се приклучува и Македонија. На овој линк , може да се приклучи секој кој што сака да биде дел од глобалната акција која се случува ширум целиот свет. Потребно е да направите фотографија од вас како садите дрво, или прегрнувате дрво, и да ја поставите на социјалните платформи: „Фејсбук“, „Инстаграм“ или „Твитер“, со користење на хаштаговите: #GG4Trees #HugATreeWithPassion #EarthDay2016.
Исто така, во недела, на 24 април, ќе се одржи априлскиот месечен „Прв до врв“, посветен на Денот на планетата Земја.
Неколку факти за Денот на планетата Земја
- Оваа година, една милијарда луѓе од целиот свет ќе бидат вклучени во одбележување на Денот на планетата Земја;
- Денот има свое знаме со фотографија од Земјата, фотографирана од „Аполо 17“ за време на неговиот пат накај Месечината;
- На првото одбележување на Денот на планетата Земја во 1970 година, учествувале 20 милиони луѓе.
