Споделете со пријателите!
Дијабетесот, е уште една болест на денешницата која не бира возраст ниту пол, и која може да биде причина за оштетувања на голем број органи во човековото тело, а на крај може да биде и причина за смрт.
„Ефект на циметот врз намалувањето на гликемијата на гладно е неоспорен и е веќе докажан.“
Дијабетесот е една од главните причини за оштетување на видот (слепило), оштетување на бубрезите, срцеви удари, мозочни удари, и ампутации. Светската здравствена организација известува дека бројот на дијабетичари се зголемил за четири пати во 2014, за разлика од 1980, и дека светската преваленца на дијабетес кај лица над 18 години, пораснала од 4,7% во 1980 на 8,5% во 2014. Од тука е јасно дека дијабетесот се шири со голема брзина, и од голема важност е да се пронајдат вистинските превентивни методи за спречување на брзото ширење на оваа болест, и најефикасните третмани- за случаи во кои болеста веќе е дијагностицирана. Добрата вест е дека дијабетесот може да се превенира или барем да се одложи со помош на правилна исхрана физичка активност, одржување нормална телесна маса и избегнување на користење цигари (тутун), а исто така откако ќе се дијагностицира може да се третира за да се спречат понатамошни компликации и оштетувања на одредени органи со помош на исхрана, физичка активност, медикаменти и редовни контроли и тестирања. Научниците се во постојана потрага за лекови или растенија со антидијабетски ефект, а едно такво растение е токму цејлонскиот цимет, па во понатамошниот текст ќе наведеме резултати од неколку студии кои го проучуваат антидијабетскиот ефект на циметот.
- Во студија со 25 испитаници – дијабетичари, на учесниците им било давано или 1 гр цимет, или плацебо во рок од 12 недели. Резултатот бил: забележителна редукција на нивото на гликемија на гладно кај лицата што примале цимет во споредба со оние на плацебо и во споредба со почетните резултати. Воочено е и мало (статистички незначајно) намалување на нивото на гликолизиран хемоглобин. Друг интересен ефект кој се воочил кај испитаниците што примале цимет е зголемување на нивоата на супероксид дисмутаза- моќен антиоксидант во нашето тело.
- Во друга студија со 543 испитаници е забележано статистички значајно намалување на нивото на гликемија на гладно, тотален холестерол, ЛДЛ холестерол, ниво на триглицериди, и покачување на нивото на ХДЛ холестеролот, но исто така не биле забележани значајни намалување на нивото на гликолизиран хемоглобин.
- Во студија со стаорци било испитувано дали ефектот на циметот е инсулин зависен или инсулин независен. Стаорците кои примале цимет имале подобра регулација на глукозниот транспортер 4 (GLUT4), и на митохондрискиот UCP-1 во нивното кафеаво масно ткиво и во нивните мускули. Значи циметот ја подобрува функцијата на транспортерот и на горенаведениот протеин со што се зголемува искористување на гликозата, што на крај резултира со антидијабетски ефекти кои не се зависни од инсулинот.
Иако сеуште не може да се даде јасен закучок за комплетниот антидијабетски ефект на циметот (поради малото – незначајно намалување на гликолизирачкиот хемоглобин), сепак неговиот ефект врз намалувањето на гликемијата на гладно е неоспорен и е веќе докажан, па затоа сите оние што имаат проблем со високи нивоа на гликемија на гладно можат да го вклучат цејлонскиот цимет во исхраната.
Споделете со пријателите!
