Амбалажата во иднина ќе може да се јаде

Не само тортата, во иднина ќе може да ја изедете и амбалажата ако сте многу гладни  

Пакувањето на храната е проблем за кој можеби не сте постојано свесни дека постои. Од друга страна, големите компании кои што произведуваат храна, трошат време и ресурси за да најдат амбалажа која што нема многу да загадува, која полесно ќе се рециклира и ќе претставува помал отпад. И претходно постоеле обиди да се направи амбалажа која лесно ќе се разгради и дури и ќе може да се јаде, но најновиот обид засега изгледа многу ветувачки.

Научниците од Министерството за земјоделство на САД, открија дека млечниот протеин казеин може да се употреби за да се направи биоразградувачка амбалажа која што може да се јаде. Не само што ова пакување е подобро за животната средина, туку е и подобро од пластиката во зачувување на храната, велат научниците. За да го подобрат квалитетот, тие додале и цитрусен пектин и глицерол за помека обвивка и поголема заштита од влага и високи температури. Единствениот проблем на оваа обвивка е дека се разложува во вода, па производите спакувани во неа ќе треба внимателно да се чуваат, односно постојано да бидат на суво и чисто место.