29 септември – Светскиот ден на срцето [ВИДЕО]

Светскиот ден на срцето се одбележува секоја година на 29ти септември за да се подигне свеста на луѓето за кардиоваскуларните болести

Кардиоваскуларните болести се главна причина за смрт кај 17.3 милиони лица годишно на светско рамниште, а оваа бројка постојано се зголемува. До 2030 година се предвидува дека 23 милиони луѓе ќе умрат поради срцеви болести. Како и да е, многу од кардиоваскуларните заболувања може да бидат превенирани, обрнувајќи поголемо внимание на ризик факторите. Ова вклучува водење на здрав начин на живот, избегнување на никотин и откажување од пушење цигари, јадење на здрава храна и вежбање (соодветна физичка активност), но и со редовни прегледи.

Факти за кардиоваскуларните болести:

• Кардиоваскуларните болести се број еден причина за смрт во светот. Многу повеќе луѓе умираат од овој вид на болести, во споредба со било кое друго заболување;
• Повеќе од три четвртини од сите смртни случаи предизвикани од кардиоваскуларните болести имаат место во сиромашните земји, конкретно во земјите со ниски и средни примања;
• Повеќето од кардиоваскуларните заболувања можат да бидат спречени и превенирани со следење на сите потенцијални симптоми;
• Луѓето со кардиоваскуларни болести и оние кои имаат голем ризик од појава на вакви болести (поради генетика) имаат потреба од рана дијагностика, т.е. рано откривање и редовно следење на здравствената состојба.

Цели на овој интернационален празник се:

• Подобрување на здравјето на срцето и целиот кардиоваскуларен систем кај луѓето, преку намалување на факторите на ризик поврзани со однесувањето и начинот на живот, како што се пушењето, пиењето алкохол, недостатокот на физички активности и недоволна и несоодветна исхрана;
• Фокус на децата и жените со кардиоваскуларни болести, со подигање на свеста за рани прегледи и обезбедување на соодветна нега;
• Обезбедување на соодветни информации за срцевото здравје на целото население, како на пример летоци или брошури за ризик факторите и симптомите на кардиоваскуларните болести и срцеви удари;
• Развој на здравствени политики во насока на намалување на кардиоваскуларните болести, како што е на пример фокусот на штетноста од никотин воведувањето на забрана за пушење цигари, поскапување на цигарите, казни за пушење на јавни места итн;
• Промовирање на здрави животни навики, особено здрави прехранбени навики, со подигање на свеста за ризиците од прекумерна дебелина и постојано консумирање на нездрава храна и за важноста на цело-зрнестите производи, овошни и зеленчукови плодови, т.е. подигање на свеста за важноста од свежата природна храна во диетата;
• Подигање на свеста кај луѓето за важноста од кардиоваскуларните вежби, најмалку 30 минути дневно, што може да спречи појава на кардиоваскуларните болести.

За повеќе информации посетете ја страницата на Светската Срцева Федерација – World Heart Federation.